Prezident Andijonda gastronomik ko‘cha va yo‘l o‘tkazgichni ko‘zdan kechirdi

Prezident Shavkat Mirziyoyev 23-sentabr kuni kechqurun Andijonda tashkil etilgan gastronomik ko‘cha bilan tanishdi.

Uzunligi 1,2 kilometr bo‘lgan loyiha Mashrab va Sariquy ko‘chalarini qamrab olgan. Uning umumiy qiymati 18 mlrd so‘mni tashkil etib, shundan 8 mlrd so‘mi respublika budjeti, 10 mlrd so‘mi esa tadbirkorlar mablag‘lari hisobidan moliyalashtirilgan.

Bu yerda keng piyodalar yo‘laklari barpo etilgan, zamonaviy landshaft dizayni yaratilgan, favvoralar va yoritish vositalari o‘rnatilgan.

Hozirda ko‘chada 35 ta savdo obyekti joylashgan bo‘lib, ularning ayrimlari kechayu kunduz faoliyat yuritishga mo‘ljallangan. Ko‘cha kuniga 10 mingdan ortiq aholi va sayyohni qabul qilish imkoniyatiga ega.

Davlat rahbari ko‘cha bo‘ylab sayr qilib, aholi va tadbirkorlar bilan muloqot qildi.

Shu kuni prezident Andijon vokzali yaqinidagi yangi yo‘l o‘tkazgichni ham ko‘zdan kechirdi. Inshoot Boburshoh ko‘chasining ikki qismini o‘zaro bog‘ladi.

Qiymati 271 mlrd so‘m bo‘lgan yo‘l o‘tkazgichning umumiy uzunligi 796 metrni (estakada qismi 596 metr), kengligi esa 26 metrni tashkil etadi.