O‘zbekistonda 6-mart kuni metan zapravkalari xususiy transportga xizmat ko‘rsatishni to‘xtatdi

Vaqtinchalik cheklovlar aholi va ijtimoiy soha obyektlarini yoqilg‘i bilan ta’minlash maqsadida joriy etildi

O‘zbekistonda avtomobillarga gaz to‘ldirish kompressor stansiyalari faoliyatiga qo‘yilgan cheklovlar kuchaytirildi. Bu haqda O‘zbekiston Energetika vazirligi matbuot xizmati xabar berdi.

Ma’lum qilinishicha, 6-mart kuni kun davomida metan zapravkalari faqat jamoat transporti hamda ijtimoiy muassasalarga biriktirilgan transport vositalariga xizmat ko‘rsatadi. Xususiy avtomobillarga gaz quyish vaqtincha to‘xtatilgan.

Bunday qaror magistral gaz quvurlarida bosim keskin pasaygani sabab qabul qilingan. Vazirlik ma’lumotiga ko‘ra, ustuvor vazifa — aholi uy-joylari va ma’muriy binolarni tabiiy gaz bilan uzluksiz ta’minlashdir.

Eslatib o‘tamiz, 4-mart kuni sovuq ob-havo fonida metan zapravkalari faoliyati 19:00 dan 5-mart soat 10:00 gacha cheklangandi. 5-mart kuni esa stansiyalar kuniga 6 soat — 10:00 dan 16:00 gacha ishlashi belgilangan edi.