Namanganga $5 mlrd xorijiy investitsiya jalb etish rejalashtirilmoqda

Prezident Shavkat Mirziyoyev Namangan viloyatini ijtimoiy-iqtisodiy va infratuzilmaviy rivojlantirish masalalariga bag‘ishlangan yig‘ilish o‘tkazdi. Bu haqda prezident matbuot xizmati ma’lum qildi.

Yig‘ilishda qayd etilishicha, 2026-yilda Namangan viloyatiga $5 mlrd xorijiy investitsiya jalb etish va eksport hajmini $1,2 mlrdga yetkazish vazifasi belgilangan. Shuningdek, beshinchi Toshkent xalqaro investitsiya forumi yakunlari bo‘yicha umumiy qiymati $3 mlrd bo‘lgan 43 ta loyihani amalga oshirish tasdiqlangan.

Eksport hajmini oshirish maqsadida mahsulot ishlab chiqarish, bojxona rasmiylashtiruvi va logistika jarayonlarini qamrab oluvchi yagona tizim yaratish rejalashtirilmoqda.

Kommunal infratuzilmani yaxshilash uchun 703 mlrd so‘m yo‘naltiriladi. Ushbu mablag‘lar hisobidan 130 km ichimlik suvi tarmoqlari, 2,5 km kanalizatsiya liniyalari quriladi hamda 9 ta yangi suv inshooti barpo etiladi.

Natijada 34 ming nafar aholi ilk bor markazlashgan ichimlik suvi bilan ta’minlanadi, yana 25 ming nafar fuqaro kanalizatsiya tizimiga ulanadi. Namangan shahrida oqova suv tizimini rekonstruksiya qilish ishlari davlat-xususiy sheriklik asosida amalga oshiriladi.

Shuningdek, “Pop–Namangan” avtomobil yo‘lining 75 km qismida keng ko‘lamli rekonstruksiya ishlari olib boriladi. Yo‘l to‘rt tasmali beton qoplamali magistralga aylantirilib, qo‘shimcha ravishda 21 ta ko‘prik va 22 ta piyodalar o‘tish joyi quriladi.

Jamoat transportini yangilash doirasida kuz boshigacha viloyatga 90 ta avtobus, 50 ta elektrobus va 30 ta mikroavtobus yetkazib berilishi kutilmoqda. 2027-yil iyuligacha esa hudud yana 105 ta elektr transport vositasi bilan ta’minlanadi.

Sog‘liqni saqlash sohasida ham qator yangiliklar rejalashtirilgan. Kosonsoy va Uychi tumanlarida birlamchi tibbiy-sanitariya yordamini ko‘rsatishning yangilangan modeli joriy etiladi. Oktabr oyidan boshlab Namangan, Andijon va Farg‘ona viloyatlarida infarkt va insultlarga qarshi davlat dasturi ishga tushiriladi.

Yig‘ilishda, shuningdek, biznesni yashirin iqtisodiyotdan chiqarish, huquqbuzarliklarning oldini olish hamda yoshlar bandligini ta’minlash masalalari ham muhokama qilindi.