O‘zbekistondagi 34 ta turizm obyektining master-rejalari ishlab chiqiladi

Prezidentning 2026-yil 30-apreldagi “Hududlarda turizm infratuzilmasini jadal rivojlantirish va sohada loyiha boshqaruvi tizimini joriy etish chora-tadbirlari to‘g‘risida”gi qarori qabul qilindi.

Hujjatga ko‘ra, “Jozibador manzil – loyiha – infratuzilma – tadbirkor – targ‘ibot – sayyoh” zanjiri asosida loyiha boshqaruvi tizimi joriy etiladi. Shu doirada 34 ta turizm obyektining master-rejalari ishlab chiqiladi, 31 ta obyekt faoliyati tashkil etilib, rivojlantiriladi.

Turizm infratuzilmasini rivojlantirish bo‘yicha loyiha ofisi barcha turdagi turistik zonalar va klasterlar faoliyatini muvofiqlashtiruvchi yagona tuzilma sifatida belgilandi.

2026-yil 1-iyundan boshlab ziyoratgoh hududlarining funksional chegaralari bosqichma-bosqich aniqlanadi, zarur hollarda ularni kengaytirish va foydalanish uchun alohida dizayn-kod joriy etiladi.

Shuningdek, sohada “davlat – biznes – jamoatchilik – ta’lim” (Quattro) hamkorlik modeli yo‘lga qo‘yiladi. 2027-yildan boshlab esa Turizmni qo‘llab-quvvatlash jamg‘armasi hisobidan yiliga ikki marta sayyohlar o‘rtasida tanlanma kuzatuvlar o‘tkaziladi.

Qarorga muvofiq, 2026-yil 1-sentabrdan boshlab turizmni rag‘batlantirish mexanizmlari joriy etiladi. Xususan, 2030-yil oxirigacha xorijiy turoperatorlar vakillarining transport, yashash va ovqatlanish xarajatlarining bir qismi qoplanadi.

Bundan tashqari, mahalliy turoperatorlarning xorijdagi targ‘ibot xarajatlarining 25% igacha (500 mln so‘mgacha) kompensatsiya qilinadi. Shuningdek, tadbirkorlarning sayyohlar uchun madaniy va ko‘ngilochar tadbirlar tashkil etish bilan bog‘liq xarajatlari ma’lum muddat davomida moliyalashtiriladi.