3-maydan Toshkent–Xiva yo‘nalishida Hyundai Rotem tezyurar poyezdi yo‘lga qo‘yiladi

3-maydan boshlab Toshkent va Xiva o‘rtasida “Jaloliddin Manguberdi” nomli yangi tezyurar elektropoyezd qatnay boshlaydi. Bu haqda “O‘zbekiston temir yo‘llari” matbuot xizmati ma’lum qildi.

Poyezd Toshkent Shimoliy (Markaziy) vokzalidan soat 07:00 da jo‘nab, Xivaga 14:31 da yetib boradi. Qarshi yo‘nalishda esa poyezd 07:20 da jo‘nab, 14:51 da manzilga yetadi.

Qatnovlar haftasiga uch marta — seshanba, payshanba va shanba kunlari amalga oshiriladi. Qaytish reyslari chorshanba, juma va yakshanba kunlariga belgilangan. Chiptalarni temir yo‘l kassalari va onlayn platformalar orqali xarid qilish mumkin.

Bir yo‘nalish uchun chipta narxi 780 ming so‘m etib belgilangan.

Mazkur Hyundai Rotem elektropoyezdi 7 vagondan iborat bo‘lib, 390 yo‘lovchini sig‘dira oladi va 260 km/soat tezlikka chiqish imkoniyatiga ega. Poyezd mamlakat iqlim sharoitiga moslashtirilgan bo‘lib, chang, qum bo‘ronlari va keskin harorat farqlariga chidamli.