O‘zbekiston davlat qarzi $43 mlrddan oshdi

Iqtisodiyot va moliya vazirligi ma’lumotiga ko‘ra, 2025-yil 1-iyul holatida O‘zbekistonning davlat qarzi $43,376 mlrdni tashkil etdi. Shundan $36,41 mlrd — tashqi qarz, $6,96 mlrd — ichki qarz hisoblanadi.

Bir yil davomida qarz $6,135 mlrdga ko‘paydi. YaIMga nisbatan ulushi ham oshib, 32,4% dan 34,2% ga yetdi.

Hisobot davri yakuniga ko‘ra, jami davlat tashqi qarzining 47%i ($16,9 mlrd) budjetni qo‘llab-quvvatlashga, 16%i ($5,9 mlrd) yoqilg‘i-energetika sohasiga, 9%i qishloq va suv xo‘jaligiga ($3,1 mlrd), 8%i ($2,9 mlrd) transport va transport infratuzilmasiga, 8%i uy-joy kommunal xo‘jaligiga ($3 mlrd) yo‘naltirilgan.

Asosiy kreditorlar quyidagilar:

• Jahon banki — $7,8 mlrd;
• Osiyo taraqqiyot banki — $7,4 mlrd;
• Xalqaro investorlar (yevrobondlar) — $5,7 mlrd;
• Xitoy moliya tashkilotlari — $3,8 mlrd;
• Yaponiya moliya tashkilotlari — $3,2 mlrd;
• Osiyo infratuzilma investitsiyalari banki — $1,7 mlrd;
• Fransiya moliya tashkilotlari — $1,1 mlrd;
• Islom taraqqiyot banki — $935 mln;
• Koreya moliya tashkilotlari — $750 mln;
• Xalqaro valyuta jamg‘armasi — $642 mln;
• Germaniya davlat banki — $481 mln;
• Yevropa tiklanish va taraqqiyot banki — $401 mln;
• Boshqa moliyaviy tashkilotlar — $2,5 mlrd.