YTTBning O‘zbekistondagi loyihalari portfeli $7 mlrddan oshdi

O‘zbekiston prezidenti Shavkat Mirziyoyev 11-noyabr kuni Antalyada COP31 sammiti doirasida Yevropa tiklanish va taraqqiyot banki (YTTB) prezidenti Odil Reno-Basso bilan uchrashdi. Bu haqda prezident matbuot xizmati xabar berdi.

Uchrashuvda tomonlar hamkorlikni yanada kengaytirish va kelgusi yil uchun moliyalashtirishning asosiy yo‘nalishlarini muhokama qildi.

O‘zbekiston ketma-ket olti yildan beri YTTBning mintaqadagi eng yirik mablag‘ oluvchisi bo‘lib qolmoqda. Bankning mamlakatdagi loyihalari portfeli $7 mlrddan oshgan. 2025-yilda bank operatsiyalari hajmi ilk bor $1 mlrdlik chegaradan o‘tgan.

Bank investitsiyalarining qariyb 60% O‘zbekistonda “yashil” iqtisodiyot loyihalariga yo‘naltirilgan.

2027-yil uchun ustuvor yo‘nalishlar sifatida elektr tarmoqlarini modernizatsiya qilish, agrooziq-ovqat sektorini rivojlantirish, bank sohasida xususiylashtirish va Toshkent xalqaro moliya markazini ishga tushirish belgilangan. Shuningdek, davlat-xususiy sheriklik loyihalarini ilgari surish masalasi ham muhokama qilingan.

Bundan tashqari, 2027-yilda o‘tkazilishi rejalashtirilgan Xorijiy investorlar kengashining navbatdagi yig‘ilishiga tayyorgarlik masalalari ko‘rib chiqilgan.