O‘zbekistonda yo‘l bezoriligi uchun avtomobilni musodara qilish rejalashtirilmoqda

O‘zbekistonda yo‘l harakati qoidalarini qo‘pol ravishda buzgan haydovchilarga nisbatan javobgarlikni kuchaytirish taklif qilinmoqda. Bu haqda YHXX boshlig‘i Sherzod Ibragimov “O‘zbekiston 24” telekanaliga bergan intervyusida ma’lum qildi.

Uning so‘zlariga ko‘ra, yo‘l-transport hodisalarining oldini olish maqsadida idoralararo ishchi guruh tomonidan amaldagi javobgarlik choralarini takomillashtirishga qaratilgan takliflar ishlab chiqilib, Prezident Shavkat Mirziyoyevga taqdim etilgan.

Qayd etilishicha, voyaga yetmaganlarga transport vositasini boshqarishga berish holatlari hamda noqonuniy poygalar oqibatida o‘lim va tan jarohati bilan bog‘liq YTHlar soni ortmoqda. Shu bilan birga, aholi yashash punktlarida tashkil etilayotgan noqonuniy poygalar yo‘l harakati xavfsizligiga jiddiy tahdid tug‘dirmoqda.

Shu munosabat bilan yo‘l harakati qoidalarini qo‘pol ravishda buzishning besh turi uchun ma’muriy jazolar qatoriga transport vositasini vaqtincha olib qo‘yish chorasi kiritilishi taklif etilgan.

Takliflarga ko‘ra, avtomobilni voyaga yetmagan shaxsga boshqarish uchun berish, noqonuniy poygalarni tashkil etish va ularda ishtirok etish uchun alohida ma’muriy javobgarlik joriy qilinadi.

Bundan tashqari, transport vositasini boshqarish huquqiga ega bo‘lmagan yoki ushbu huquqdan mahrum etilgan holda takroran “yo‘l bezoriligi” sodir etgan shaxslarga nisbatan avtomobilni musodara qilish yoki vaqtincha olib qo‘yish choralarini qo‘llash taklif etilmoqda.

Shuningdek, mast holatda transport vositasini boshqarganlik uchun 15 sutkagacha ma’muriy qamoq jazosi tayinlash, qo‘pol qoidabuzarlik sodir etgan haydovchilarni esa bir yil davomida jarimani chegirma bilan to‘lash huquqidan mahrum qilish ham takliflar qatoridan o‘rin olgan.