2026-yildan o‘zini o‘zi band qilganlar va YATTlarga soliq hisoboti soddalashtiriladi

Shuningdek, jismoniy shaxslarga mol-mulk ijarasi uchun stavkani to‘ldirish talabi bekor qilindi

Adliya vazirligi soliq hisobotlari shakllariga kiritilgan o‘zgarishlarni davlat ro‘yxatidan o‘tkazdi.

Unga ko‘ra, yillik aylanmasi 1 mlrd so‘mgacha bo‘lgan YATTlar va o‘zini o‘zi band qilganlar uchun 1% lik aylanmadan olinadigan soliq joriy etilishi munosabati bilan soddalashtirilgan hisobot shakli tatbiq etiladi.

Shuningdek, quvvati 100 kVtgacha bo‘lgan qayta tiklanuvchi energiya manbalari orqali ishlab chiqarilgan va umumiy tarmoqqa sotilgan elektr energiyasidan olinadigan foyda uchun nol soliq stavkasi qo‘llanishi hisobot shakllariga kiritildi.

Yana bir muhim o‘zgarishga ko‘ra, xalq deputatlari kengashlariga tuman va shaharlarning iqtisodiy rivojlanish darajasidan kelib chiqib ijara stavkalariga 2,0 gacha oshiruvchi koeffitsiyent joriy etish huquqi berilgan. Shu sababli jismoniy shaxslar tomonidan mol-mulk ijarasi uchun stavka to‘ldirilishi bekor qilinmoqda.

Mazkur o‘zgarishlar 2026-yil 1-yanvardan kuchga kiradi.