Uzbekistan GTL’ni xususiylashtirish va IPO’ga chiqarish ishlari boshlandi

Yonilgʻi mahsulotlari ishlab chiqaruvchi Oʻzbekistondagi yirik zavodlardan biri Uzbekistan GTL’ni xususiylashtirish boʻyicha ishlar boshlangan. Bu haqda Davlat aktivlarini boshqarish agentligi direktori Sohibjon Murodov 8-oktyabr kuni Toshkent shahrida oʻtgan matbuot anjumanida maʼlum qildi.

Tadbirda 2025-yildagi prezident farmoni asosida kreditlar evaziga qurilgan zavod xususiylashtirilishi belgilangani, hozirda vaziyat qandayligi toʻgʻrisida soʻraldi. Agentlik rahbarining aytishicha, kompaniyani sotish konsepsiyasi mavjud. Hozirda xususiylashtirish boʻyicha ishlar boshlangan.

Uzbekistan GTL’ni xususiylashtirish konsepsiyasi mavjud va bu jarayon boshlangan. Uning ta’kidlashicha, prezident qarorida belgilangan muddat zavodni aynan shu vaqtda sotish emas, balki xususiylashtirish jarayonini boshlashni anglatadi.

Xususiylashtirishdan oldin korxonaning moliyaviy-xo‘jalik faoliyati auditdan o‘tkaziladi, ishlab chiqarish va moliyaviy ko‘rsatkichlarga salbiy ta’sir qiluvchi omillar o‘rganiladi. Shuningdek, zavod xususiylashtirilganidan keyin bu jarayonning iqtisodiyot, yetkazib beruvchilar va mahsulot xaridorlariga ta’siri tahlil qilinadi.