Toshkent–Xiva yo‘nalishida ikkinchi Hyundai Rotem tezyurar poyezdi qatnay boshlaydi

22-iyuldan boshlab Toshkent va Xiva o‘rtasidagi temiryo‘l yo‘nalishida “Jaloliddin Manguberdi” nomli qo‘shimcha tezyurar poyezd qatnay boshlaydi. Bu haqda “O‘zbekiston temir yo‘llari” matbuot xizmati xabar berdi.

Yangi reys yo‘lovchilar orasida ortib borayotgan talabni qondirish maqsadida yo‘lga qo‘yilmoqda. Poyezd Toshkent Markaziy (Shimoliy) vokzalidan dushanba, chorshanba va juma kunlari soat 07:00 da, Xivadan esa seshanba, payshanba va shanba kunlari soat 07:15 da jo‘naydi.

Safar davomiyligi 7 soat 36 daqiqani tashkil etadi.

May oyida ushbu yo‘nalishda qatnay boshlagan birinchi tezyurar poyezd bilan birgalikda Toshkent va Xiva o‘rtasidagi qatnovlar deyarli har kuni amalga oshiriladi. Yangi jadvalga ko‘ra, ikki shahar o‘rtasida poyezdlar haftasiga olti kun qatnaydi.

To‘g‘ridan-to‘g‘ri yo‘nalish bo‘yicha yakshanba, Xivadan qaytish yo‘nalishi bo‘yicha esa dushanba kunlari qatnov amalga oshirilmaydi.

Mart oyi o‘rtalarida Prezident Shavkat Mirziyoyev Hyundai Rotem kompaniyasi ishlab chiqargan yangi tezyurar poyezdni shaxsan sinovdan o‘tkazib, unda Samarqanddan Narpay tumanigacha safar qilgandi. Mazkur tarkib O‘zbekistonga yetkazilishi rejalashtirilgan oltita poyezdning birinchisi bo‘lib, unga “Jaloliddin Manguberdi” nomi berilgan.

Uzunligi 175 metr bo‘lgan poyezd yettita vagondan iborat bo‘lib, 390 nafar yo‘lovchini VIP, biznes va ekonom klasslarida tashish imkoniyatiga ega. Tarkib soatiga 260 kilometr tezlikka erisha oladi. Shuningdek, u O‘zbekiston iqlim sharoitiga moslashtirilgan bo‘lib, chang, qum bo‘ronlari hamda keskin harorat o‘zgarishlaridan himoya tizimlari bilan jihozlangan.