Xitoyning COVEC kompaniyasi Toshkent — Samarqand pullik avtomobil yo‘lini quradi

Xitoyning China Overseas Engineering Group (COVEC) kompaniyasi Toshkent va Samarqand o‘rtasidagi pulli avtomobil magistralini qurish bilan shug‘ullanadi. Bu haqda kompaniya rahbari Van Kun poydevorga tamal toshini qo‘yish marosimida ma’lum qildi, deb xabar bermoqda O‘zbekiston 24.

Avvalroq, 22-iyul kuni Shavkat Mirziyoyev mazkur infratuzilma obyektidagi qurilish ishlariga rasman start bergandi.

Xitoylik pudratchi rahbarining so‘zlariga ko‘ra, ushbu loyiha kompaniyaning O‘zbekiston hududidagi eng yirik qurilish shartnomalaridan biriga aylanadi.

Kelgusida yangi pulli avtomagistral Xitoy — Qirg‘iziston — O‘zbekiston xalqaro transport yo‘lagining muhim qismi bo‘lishi kutilmoqda. Hozirning o‘zida ham ushbu yo‘l mamlakat ichki transport tizimining muhim elementi hisoblanadi.

Obyekt foydalanishga topshirilgach, hududlar o‘rtasidagi transport aloqalari sezilarli darajada yaxshilanishi kutilmoqda. Bu ichki logistika tizimini optimallashtirish va zamonaviy iqtisodiy koridorni shakllantirish imkonini berib, mamlakatning ijtimoiy-iqtisodiy rivojlanishiga ijobiy ta’sir ko‘rsatishi kerak.

Magistralni qurishda pudratchi kompaniya xalqaro standartlarga amal qilishni rejalashtirmoqda. Asosiy e’tibor mehnat xavfsizligini ta’minlash, atrof-muhitga yetkaziladigan zararlarni minimallashtirish hamda ekologik qurilish texnologiyalaridan foydalanishga qaratiladi.

China Overseas Engineering Group rahbari, shuningdek, O‘zbekiston Xitoyning “Bir makon — bir yo‘l” global tashabbusi doirasidagi asosiy hamkorlaridan biri ekanini eslatdi.

Korporatsiya ikki tomonlama hamkorlikni yanada kengaytirish imkoniyatlarini ko‘rib chiqmoqda. Transport infratuzilmasidan tashqari, Xitoy tomoni foydali qazilmalarni qazib olish, toza energetikani rivojlantirish, suv xo‘jaligi va sanoat kooperatsiyasi yo‘nalishlaridagi qo‘shma loyihalarga ham qiziqish bildirmoqda.

Nutqining yakunida Van Kun loyiha taqdimotidan so‘ng Shavkat Mirziyoyevdan qator aniq topshiriqlar olganini qo‘shimcha qildi. Uning ta’kidlashicha, kompaniya rahbariyati va mutaxassislari ularni bajarish uchun barcha zarur resurslarni safarbar etadi.