O‘zbekiston Xitoy bilan geologiya sohasida 13 ta loyihani amalga oshiradi

Avval xabar berilganidek, 2-sentabr kuni Pekinda O‘zbekiston prezidenti Shavkat Mirziyoyev va Xitoy raisi Si Szinpin boshchiligidagi rasmiy delegatsiyalar o‘rtasida muzokaralar bo‘lib o‘tdi.

Uchrashuvda ikki mamlakat o‘rtasidagi savdo hajmini sanoat va qishloq xo‘jaligi mahsulotlari yetkazib berish orqali $20 mlrdga yetkazish masalasi muhokama qilindi.

“O‘zbekiston 24” telekanaliga bergan intervyusida konchilik va geologiya vaziri Bobir Islomov, energetika xomashyosi – jumladan, ko‘mir, uran va boshqa foydali qazilmalarni qazib olish hamda qayta ishlash bo‘yicha yirik qo‘shma loyihalar tayyorlanganini ma’lum qildi. Tomonlar umumiy qiymati qariyb $5 mlrdga teng bo‘lgan 13 ta yangi loyihani amalga oshirishga kelishib oldi.

Islomovning ta’kidlashicha, prezidentning Xitoyga tashrifi yangi imkoniyatlarni ochib, hamkorlikni yangi bosqichga olib chiqadi.

Bundan bir kun oldin Mirziyoyev Xitoy Milliy yadro korporatsiyasi (CNNC) raisi Shen Yanfeng bilan uchrashib, O‘zbekistonda istiqbolli loyihalarni amalga oshirish masalalarini ko‘rib chiqqan edi. Muzokaralarda Geologiya vazirligi rahbari ham qatnashdi.

Uchrashuvda xususan, Xitoyning zamonaviy texnologiyalarini O‘zbekistonga olib kirish, uran konlarini o‘zlashtirish, istiqbolli hududlarda geologik-qidiruv ishlarini kengaytirish hamda tinch atom energetikasi sohasidagi hamkorlik masalalari muhokama qilindi.