Wildberries UzPost’ga 360 mlrd so‘mlik foizsiz kredit ajratishi mumkin

Wildberries UzPost uchun 360 mlrd so‘mgacha bo‘lgan foizsiz kredit liniyasini ochishi mumkin. Bu haqda jurnalistlar bilan o‘tkazilgan matbuot anjumanida Davlat aktivlarni boshqarish agentligi (DABA) vakillari ma’lum qildi.

Gap butun summani bir vaqtning o‘zida olish haqida ketmayapti. Agentlik vakili tushuntirishicha, kompaniya zaruratga qarab 360 mlrd so‘m doirasida mablag‘ jalb qilish imkoniyatiga ega bo‘ladi. Alohida xaridlar va yo‘nalishlar bo‘yicha mablag‘lardan foydalanishdan avval ularning samaradorligi baholanishi kerak.

Avvalroq UzPost tomonidan yillik 14% stavkada 100 mlrd so‘mlik kredit olish masalasi kun tartibiga kiritilgan edi. Biroq bu bo‘yicha qaror qabul qilinmagan. Kompaniyada tushuntirilishicha, muhokamalar davomida mablag‘lardan foydalanish yo‘nalishlari va loyiha qo‘shimcha qarz yukini shakllantirmagan holda kreditni qaytarish imkoniyatiga ega ekaniga oid savollar yuzaga kelgan.

Hozirda UzPost hamkorlar bilan boshqa moliyalashtirish mexanizmi bo‘yicha muzokaralar olib bormoqda. Variantlardan biri Wildberries tomonidan 360 mlrd so‘mlik foizsiz kredit liniyasining taqdim etilishidir.

Nega Wildberries kuzatuv kengashiga kiritildi?

AUCA Wildberries bilan hamkorlik faqat moliyalashtirish bilan cheklanmasligini ta’kidladi. Kompaniya pochta operatorini rivojlantirish strategiyasini ishlab chiqishda Rossiyaning marketplace tajribasidan ham foydalanishni rejalashtirmoqda.

Wildberries vakillari UzPost kuzatuv kengashiga taklif etilgan. Bunda UzPost’ning aksiyadorlik tuzilmasi o‘zgarmaydi, ijro organi esa avvalgi tartibda faoliyat yuritadi.

Shuningdek, kuzatuv kengashi joriy faoliyatni bevosita boshqarish bilan shug‘ullanmasligi qayd etildi. Uning vazifasi kompaniyani rivojlantirish va jalb qilingan mablag‘lardan samarali foydalanish bilan bog‘liq strategik qarorlarni qabul qilishda ishtirok etishdan iborat.

Wildberries vakillari kuzatuv kengashiga ma’lum muddatga jalb qilingan. Kelgusida hamkorlik ish natijalariga qarab davom ettirilishi mumkin.

UzPost Uzum bilan ham hamkorlik qiladi

Wildberries UzPost hamkorlik qilayotgan yagona marketplace emas. Pochta operatorining Uzum bilan 1 mingdan ortiq shartnomasi mavjud.

Yirik platformalar uchun UzPost’ning afzalliklaridan biri mamlakat bo‘ylab 1,6 mingdan ortiq punktga ega ekanidir. Ular 208 ta tuman va shaharda faoliyat yuritadi. Bu mavjud infratuzilmadan buyurtmalarni yetkazib berish va topshirishda foydalanish imkonini beradi.

Nega pochta biznesida moliyaviy muammolar yuzaga keldi?

Avvalroq daromadning sezilarli manbalaridan biri fuqarolarga ma’muriy jarimalar to‘g‘risidagi bildirishnomalarni yetkazib berish bo‘lgan.

Mazkur xizmat Ichki ishlar vazirligi va banklar tizimlari orqali raqamli shaklga o‘tkazilgach, bunday bildirishnomalarni qog‘oz ko‘rinishida yetkazib berishga ehtiyoj kamaydi. Kompaniya ushbu yo‘nalishdan tushadigan daromadning 50–60 mlrd so‘mga qisqarganini baholamoqda.

Shu fon’da UzPost biznes modelini qayta ko‘rib chiqish va zamonaviy boshqaruv mexanizmlarini joriy etishni rejalashtirmoqda. Islohotlarning asosiy vazifalaridan biri kompaniya samaradorligini oshirish va yangi daromad manbalarini rivojlantirishdan iborat.