UzNIFning sof foydasi 2 trln so‘mga yetdi

2026-yilning birinchi yarmi yakunlariga ko‘ra, O‘zbekiston Milliy investitsiya fondi (O‘zMIF) daromadlarini keskin oshirib, 2,1 trln so‘m sof foyda qayd etdi. Bu haqda Korporativ axborot yagona portalida e’lon qilingan moliyaviy hisobotda keltirilgan.

Yanvar–iyun oylarida UzNIF 2,1 trln so‘mlik ijobiy moliyaviy natijaga erishdi. Taqqoslash uchun, 2025-yilning mos davrida fondning sof foydasi 52,6 mlrd so‘mni tashkil etgan. Moliyaviy natijalarning keskin yaxshilanishiga fond portfelidagi qimmatli qog‘ozlar qiymatining oshishi asosiy omil bo‘ldi.

Hisobotga ko‘ra, birinchi chorakda 417,4 mlrd so‘m zarar qayd etilgan bo‘lsa-da, ikkinchi chorakda aktivlar sotilmagan holda ularning bozor qiymati qayta baholanishi hisobiga moliyaviy holat ijobiy tomonga o‘zgargan.

Fondning operatsion xarajatlari 159 mlrd so‘mni tashkil etdi. Soliq to‘lovlaridan oldingi foyda 2,35 trln so‘mga, foyda solig‘i esa 300 mlrd so‘mga teng bo‘lgan.

2026-yil iyun oyi oxirida UzNIFning jami aktivlari 32,47 trln so‘mga yetdi. Shundan 32,04 trln so‘mi adolatli qiymatda baholangan investitsiyalarga to‘g‘ri keladi.

Fondning umumiy majburiyatlari 808 mlrd so‘mni tashkil etgan bo‘lib, shundan 538 mlrd so‘mi kechiktirilgan soliq majburiyatlari hissasiga to‘g‘ri keladi. Xususiy kapital hajmi esa 31,66 trln so‘mni tashkil etdi.

Hisobot davri yakunida pul mablag‘lari va ularning ekvivalentlari qoldig‘i 118 mlrd so‘mni tashkil qilgan.

Olti oy davomida fond investitsiya portfelidagi aksiyalar qiymati 2,2 trln so‘mga oshdi. Bu ko‘rsatkich realizatsiya qilinmagan daromadni anglatadi, ya’ni qimmatli qog‘ozlar sotilmagan, biroq ularning bozor bahosi oshgani sababli buxgalteriya hisobida foyda aks ettirilgan. Shu bois ushbu o‘sish real pul oqimini anglatmaydi.

Portfeldagi eng katta o‘sish “O‘zbektelekom”ning oddiy aksiyalarida kuzatildi. Ularning qiymati qariyb 150% ga oshgan. O‘zMIF telekommunikatsiya operatorining 40% lik ulushiga egalik qiladi. Umuman olganda, fond portfelida 13 ta davlat korxonasidagi ulush mavjud bo‘lib, ulardan faqat to‘rttasi “Toshkent” Respublika fond birjasida faol muomalada.

Shu bilan birga, investorlar uchun eng muhim ko‘rsatkich dividend daromadlari bo‘lib qolmoqda. 2026-yilning birinchi yarmida fond 341 mlrd so‘m dividend oldi. Bu o‘tgan yilning mos davridagi 55,4 mlrd so‘mlik ko‘rsatkichdan sezilarli darajada yuqori.

Fond ta’kidlashicha, aynan dividendlar real pul tushumini ta’minlaydi va aksiyadorlarga to‘lovlar uchun yo‘naltirilishi mumkin. Qimmatli qog‘ozlar qayta baholanishidan farqli ravishda, dividend daromadlari haqiqiy moliyaviy tushum hisoblanadi. Shu sababli O‘zMIF faoliyatining asosiy samaradorlik ko‘rsatkichlaridan biri dividendlar hajmi bo‘lib qolmoqda.

Bundan tashqari, fondning sof aktivlar qiymati (NAV) yil boshiga nisbatan 9,2% ga oshgan.