O‘zbekiston va Tojikiston chegarasida logistika markazi quriladi

O‘zbekiston–Tojikiston chegarasidagi “Fotexobod” — “Oybek” o‘tkazish punkti bazasida zamonaviy transport-logistika markazini barpo etish ishlari boshlanadi. Bu haqda Tojikistonning “Xovar” milliy axborot agentligi xabar berdi.

Yevroosiyo taraqqiyot banki (YTB), Tojikiston Transport vazirligi hamda Davlat-xususiy sheriklik loyihalarini amalga oshirish markazi o‘rtasida uch tomonlama kelishuv imzolandi. Hujjatga ko‘ra, YTBning texnik ko‘mak jamg‘armasi kelajakdagi logistika markazi uchun texnik-iqtisodiy asos (TIA) tayyorlash va uning samaradorligini baholashni moliyalashtiradi.

Tojikiston transport vaziri o‘rinbosari Shoista Saidmurodzodaning ta’kidlashicha, bu mamlakat transport sohasida davlat-xususiy sheriklik mexanizmi asosida amalga oshirilayotgan ilk loyiha hisoblanadi. Mazkur tashabbus 2028-yilgacha mo‘ljallangan davlat dasturi doirasida yo‘l-transport infratuzilmasini modernizatsiya qilish va investitsiyalarni jalb etishga qaratilgan.

YTBning Tojikiston bo‘yicha direktori Vladimir Yakunin TIA ishlab chiqilishi yirik loyiha uchun birinchi bosqich bo‘lishini qayd etdi. Hisob-kitoblar yakunlangach, bank qurilishni to‘liq moliyalashtirish imkoniyatini ko‘rib chiqadi. Kutilishicha, logistika markazining ishga tushirilishi savdo yo‘llari o‘tkazuvchanligini oshirib, mintaqaning xalqaro yuk tashishdagi rolini kuchaytiradi.