O‘zbekiston va Qirg‘iziston $1,5 mlrdlik yangi loyihalar bo‘yicha kelishuvga erishdi

O‘zbekiston va Qirg‘iziston qishloq xo‘jaligi, geologiya-qidiruv, energetika, qurilish materiallari ishlab chiqarish va transport sohalarida qo‘shma loyihalarni rivojlantirishga kelishib oldi. Bu haqda Investitsiyalar, sanoat va savdo vaziri Laziz Qudratov prezident Shavkat Mirziyoyevning Qirg‘izistonga davlat tashrifi yakunlarini izohlab, “O‘zbekiston 24” telekanaliga bergan intervyusida ma’lum qildi.

Vazirning so‘zlariga ko‘ra, tomonlar Qirg‘iziston hududida amalga oshirilishi rejalashtirilgan qator loyihalarni kelishib olgan.

Biz qoramol yetishtirish bo‘yicha qo‘shma klaster tashkil etish, Qirg‘iziston hududida sholi va kartoshka yetishtirishga kelishib oldik. Tadbirkorlarimiz qurilish materiallari sohasiga faol kirib bormoqda, alyuminiy profillar, polimer mahsulotlari va qurilish qorishmalarini ishlab chiqarmoqda, — dedi u.

Hamkorlikning yangi yo‘nalishlaridan biri geologiya-qidiruv ishlari bo‘ladi. O‘zbekistonning tegishli vazirliklari va ixtisoslashgan kompaniyalari Qirg‘iziston hududida mazkur yo‘nalishda ishlarni amalga oshirishni rejalashtirmoqda.

Bu sohada kompaniyalarimiz muayyan tajriba to‘plagan. Bugun O‘zbekistonning tegishli vazirliklari va ixtisoslashgan kompaniyalari Qirg‘iziston hududida geologiya-qidiruv ishlarini olib borish ustida ishlaydi, — dedi Laziz Qudratov.

Ustuvor yo‘nalishlar qatorida energetika, Qambarota GES loyihasini amalga oshirish va kichik energetikani rivojlantirish ham qayd etildi.

Tomonlar transport sohasidagi hamkorlikni ham alohida muhokama qildi. ISSV rahbarining so‘zlariga ko‘ra, Xitoy — Qirg‘iziston — O‘zbekiston temiryo‘li qurilishi belgilangan jadvaldan oldinda ketmoqda.

Bundan tashqari, yuklarni tranzit qilish, qayta ishlash va bojxona rasmiylashtiruvi uchun yanada qulay shart-sharoitlar yaratish bo‘yicha kelishuvlarga erishildi.

O‘zbekiston — Qirg‘iziston biznes forumi yakunlari bo‘yicha umumiy qiymati $1,5 mlrddan ortiq bo‘lgan loyihalar va savdo shartnomalarini amalga oshirishga doir hujjatlar imzolandi va kelishuvlarga erishildi, dedi vazir.

Laziz Qudratovning ta’kidlashicha, yil boshidan buyon ikki mamlakat o‘rtasidagi o‘zaro savdo hajmi 45% ga oshib, $624,6 mlnga yetgan. 2025-yil yakunlariga ko‘ra esa O‘zbekiston va Qirg‘iziston o‘rtasidagi tovar ayirboshlash hajmi 2024-yilga nisbatan 37% ga o‘sib (874,7 mlndan), $1,2 mlrdga yetgan.

Rahbarlarimizdan aniq topshiriqlar oldik, qo‘shimcha tovar guruhlari va nomenklaturani belgiladik, har ikki mamlakatning eksportchi va importchilarini aniqladik. Endi tovar ayirboshlash hajmini bir necha barobar oshirish vazifasini bajarish ustida birgalikda ishlaymiz, — dedi u.

Vazir davlat tashrifini tarixiy voqea deb atab, uning fikricha, u yaqin vaqt ichida O‘zbekiston — Qirg‘iziston munosabatlarining yangi bosqichini ochib beradi.