UzAuto Motors $350 mlnlik yevrobondlarni joylashtirdi

UzAuto Motors kompaniyasi London fond birjasida umumiy qiymati $350 mln bo‘lgan 5 yillik yevrobondlarni joylashtirdi. Bu haqda prezident raisligida o‘tkazilgan videoselektor yig‘ilishida “O‘zavtosanoat” boshqaruvi raisi Ulug‘bek Rozukulov ma’lum qildi.

Jalb etilgan mablag‘lar korxonaning aylanma aktivlar yetishmovchiligini bartaraf etishga yo‘naltiriladi. Qimmatli qog‘ozlar bo‘yicha yillik stavka 7,375%ni tashkil etdi. Jarayon tashkilotchilari sifatida Citigroup Global Capital Markets, J.P. Morgan Securities hamda Société Générale xalqaro moliyaviy institutlari qatnashdi.

Obligatsiyalarga investorlar talabi taklif hajmidan ikki baravar yuqori bo‘ldi. Bu avtomobil ishlab chiqaruvchining xalqaro qarz bozoriga ikkinchi chiqishi hisoblanadi. Kompaniya ilk bor 2021-yil bahorida $300 mln mablag‘ni 4,85% yillik stavka bilan jalb qilgan edi. Natijada yangi qimmatli qog‘ozlar daromadliligi 1,5 baravar oshdi, investorlar talabi esa birinchi emissiyaga nisbatan qariyb ikki baravar kamaydi.

Kompaniyaning o‘tgan yil birinchi yarim yilligidagi moliyaviy ko‘rsatkichlari pasayishni ko‘rsatdi. UzAuto Motors’ning sof foydasi 27,5%ga kamayib, 1,38 trln so‘mni tashkil etdi (avvalgi yilning mos davrida — 1,91 trln so‘m). Tushum ham qariyb 9,5%ga qisqarib, 21,2 trln so‘mga tushdi. Shu bilan birga, ishlab chiqarish tannarxi atigi 6,36%ga kamayib, 17,7 trln so‘mni tashkil etdi.