O‘zbekistonda ko‘chmas mulk va avtotransport uchun ijara to‘lovi eng kam stavkalari oshirilishi mumkin

O‘zbekistonda kelasi yil uchun mo‘ljallangan davlat byudjeti loyihasiga ko‘ra, 2026-yil 1-yanvardan ko‘chmas mulk va avtotransport vositalarini ijaraga beruvchi jismoniy va yuridik shaxslar uchun ijara to‘lovining eng kam stavkalarini oshirish taklif etilmoqda.

Bunda mol-mulkni ijaraga beruvchi shaxslar uchun soliq solish maqsadida qo‘llanadigan ijara to‘lovining minimal stavkalarini 7% ga indeksatsiya qilish rejalashtirilgan.

Turar joyni ijaraga berish bo‘yicha eng kam stavka quyidagicha belgilanishi kutilmoqda (1 kvadrat metr uchun oyiga):

• Toshkent shahrida — 30 ming so‘m (hozir 28 ming so‘m);
• Nukus shahri va viloyat markazlarida — 14,5 ming so‘m (hozir 13,5 ming so‘m);
• boshqa aholi punktlarida — 5,9 ming so‘m (hozir 5,5 ming so‘m).

Noturar joyni ijaraga berish bo‘yicha eng kam stavka quyidagicha belgilanishi mumkin (1 kvadrat metr uchun oyiga):

• Toshkent shahrida — 48  ming so‘m (hozir 45 ming so‘m);
• Nukus shahri va viloyat markazlarida — 28,4 ming so‘m (hozir 26,5 ming so‘m);
• boshqa aholi punktlarida — 11,8 ming so‘m (hozir 11 ming so‘m).

Yengil avtomobilni ijaraga berishning eng kam stavkasi oyiga 918 ming so‘m (hozir 858 ming so‘m), mikroavtobus, avtobus va yuk avtomobili uchun 1 mln 824 ming so‘m (1 mln 705 ming so‘m edi) etib belgilash taklif etilgan.

Hujjat loyihasida qayd etilishicha, ushbu stavkalar jismoniy va yuridik shaxslarning mol-mulkni ijaraga berishdan olingan daromadlariga soliq solish maqsadida qo‘llanadi hamda ko‘chmas mulkdan tekin foydalanish shartnomalariga (bundan yaqin qarindoshlar o‘rtasidagi tuzilgan shartnomalar mustasno) nisbatan tatbiq etiladi.

2025-yilda mol-mulkni ijaraga beruvchi shaxslar uchun soliq solish maqsadida qo‘llanadigan ijara to‘lovining minimal stavkalari 10−12% ga indeksatsiya qilingandi.