Turkiya turkiy davlatlar fuqarolari uchun mehnat faoliyatini soddalashtirdi

Turkiya hukumati Ozarbayjon, Qozog‘iston, Qirg‘iziston, Turkmaniston va O‘zbekiston fuqarolari uchun mehnat faoliyatini soddalashtirdi. Bu haqdagi farmonga prezident Rajab Toyyib Erdo‘g‘an imzo chekkan, deb xabar bermoqda Resmi Gazete.

Endilikda ushbu davlatlar fuqarolari Turkiyada murakkab ruxsatnoma tartiblarisiz ishlashi va tadbirkorlik bilan shug‘ullanishi mumkin. Yangi qoidalar ularga davlat va xususiy sektorda ishlash imkonini beradi, biroq kuch tuzilmalari va armiyada xizmat qilish bundan mustasno.

Chet ellik xodimlar Turkiya fuqarolari singari kasbiy uyushmalarda ro‘yxatdan o‘tishi shart. Shu bilan birga, Turkiya fuqaroligini olish talabi bekor qilinadi, biroq bu qoidalar ularga saylovlarda qatnashish yoki nomzod bo‘lish huquqini bermaydi.

Mazkur qaror 2025-yil 7-oktabr kuni Ozarbayjonning Gabala shahrida bo‘lib o‘tgan Turkiy davlatlar tashkilotining 12-sammitidan so‘ng qabul qilingan. Sammitda mamlakat rahbarlari iqtisodiy integratsiyani chuqurlashtirish va mehnat kuchining erkin harakati uchun qulay sharoitlar yaratish rejalari haqida bayonot bergan.