Toshkent — Yerevan o‘rtasida to‘g‘ridan-to‘g‘ri reyslar yo‘lga qo‘yilishi mumkin

Toshkent va Yerevan o‘rtasida to‘g‘ridan-to‘g‘ri aviaqatnovlar yo‘lga qo‘yilishi rejalashtirilmoqda, deb xabar bermoqda Uzbekistan Airports.

Mazkur yo‘nalish bo‘yicha muntazam reyslar 2026-yil may oyidan boshlanishi mumkin. Dastlab parvozlar haftasiga bir marta Boeing 737 samolyotlarida amalga oshirilishi kutilmoqda. Yangi yo‘nalish ikki davlat o‘rtasidagi turistik va biznes aloqalarni mustahkamlashga xizmat qiladi.

Avval ushbu yo‘nalishda yo‘lovchilar Moskva, Istanbul yoki Tbilisi orqali tranzit reyslar bilan qatnashiga to‘g‘ri kelgan. To‘g‘ridan-to‘g‘ri qatnovlarning yo‘lga qo‘yilishi esa safar vaqtini qisqartirib, yo‘lovchilar uchun qulaylik yaratadi.

Reyslarni Armanistonning Shirak Avia aviakompaniyasi amalga oshirishi rejalashtirilmoqda. Kompaniya 2019-yildan buyon faoliyat yuritib, xalqaro yo‘nalishlarda parvozlarni amalga oshirib kelmoqda. Uning aviaparki Boeing 737 oilasiga mansub samolyotlardan iborat.