Toshkentda metrosining to‘rtta bekatida yopiq turgan vestibyullar 11-dekabrdan ochiladi

Toshkent metrosining 4 ta bekatida yopiq turgan kirish-chiqish vestibyullari ochiladi, deya xabar bermoqda metropoliten matbuot xizmati.

Yo‘lovchi oqimining ortib borayotgani hamda shahar aholisining talab va istaklari tufayli 11-dekabrdan boshlab quyidagi bekatlardagi vestibyullar yo‘lovchilar uchun qayta ochiladi:

• “O‘zbekiston”;
• “Mashinasozlar”;
• “G‘afur G‘ulom”;
• “Milliy bog”.

Kompaniyaning qayd etishicha, yo‘lovchi oqimi kamligi sababli mazkur vestibyullar uzoq yillar davomida yopiq bo‘lgan. Hozirda ularda texnik yangilash ishlari yakunlanib, bekatlar kerakli jihozlar bilan ta’minlangan.