Tojikiston va Eron 2026-yil martdan xalqaro yuk tashuvchi haydovchilar uchun vizani bekor qiladi

2026-yil mart oyidan boshlab Tojikiston va Eron o‘rtasida xalqaro yuk tashish bilan shug‘ullanuvchi haydovchilar uchun vizasiz rejim joriy etiladi. Bu haqda Tojikistonning “Xovar” axborot agentligi xabar berdi.

Erishilgan kelishuvlarga muvofiq, har ikki davlatning oddiy xorijga chiqish pasportiga ega bo‘lgan haydovchilari va ularning yordamchilari chegarani viza rasmiylashtirmasdan kesib o‘tishi mumkin bo‘ladi. Ushbu tartib barcha amaldagi chegara o‘tkazish punktlariga tatbiq etiladi. Unga ko‘ra, xorijiy davlat hududida bo‘lish muddati har 90 kun davomida 30 kundan oshmasligi lozim.

Tashqi ishlar idoralari ma’lumotiga ko‘ra, mazkur tashabbus yuk tashish jarayonlarini soddalashtirish, iqtisodiy hamkorlikni mustahkamlash hamda Dushanbe va Tehron o‘rtasidagi logistika zanjiri samaradorligini oshirishga qaratilgan. Avvalroq shunga o‘xshash yengilliklar diplomatik va xizmat pasporti egalari uchun joriy etilgan edi.

Shuningdek, eslatib o‘tilishicha, aviayo‘lovchilar uchun vizasiz rejim allaqachon amal qilib kelayotgan bo‘lsa-da, quruqlik orqali yoki uchinchi davlatlar orqali kirayotgan fuqarolar uchun viza talablari saqlanib qolgan edi. Vizaviy tartibni liberallashtirish jarayoni 2023-yil noyabr oyida memorandum imzolanishi va 2024-yil yozida hujjatlar ikki mamlakat parlamentlari tomonidan ratifikatsiya qilinishi bilan boshlangan.