Toshkent xalqaro investitsiya forumida $43 mlrdlik bitimlar imzolandi

Beshinchi Toshkent xalqaro investitsiya forumi yakunlariga ko‘ra, umumiy qiymati $43,1 mlrd bo‘lgan 166 ta shartnoma imzolandi. Bu haqda Investitsiyalar, sanoat va savdo vazirligi matbuot xizmati ma’lum qildi.

Mazkur ko‘rsatkichlar xorijiy investorlarning mamlakat ichidagi aniq tarmoq loyihalarini moliyalashtirishga tayyorligini namoyon etadi. So‘nggi yillarda forum imkoniyatlarni taqdim etish maydonidan moliyaviy mexanizmlar va sanoat hamkorligini amaliy muhokama qilish platformasiga aylandi.

2026-yilda tadbirda 10,4 ming nafar ro‘yxatdan o‘tgan ishtirokchi qatnashdi. Ulardan 3,8 ming nafari 102 ta davlatdan tashrif buyurgan xorijiy delegatlardir. So‘nggi to‘rt yil ichida xorijiy mehmonlar soni 3,5 baravardan ko‘proqqa oshdi.

Ishbilarmonlik dasturida real iqtisodiyot sektorining 3 ming 145 nafar vakili ishtirok etdi, bu o‘tgan yilgi ko‘rsatkichdan 1,4 ming kishiga ko‘pdir. Ular orasida BlackRock, JPMorgan Chase, Citibank, Visa, Bank of China, BP, Airbus, Coca-Cola va boshqa transmilliy tashkilotlar rahbariyati ham bor.

Forum ishtirokchisi bo‘lgan kompaniyalar aktivlarining umumiy qiymati $42 trlnga yetadi, bu uzoq muddatli kapitalni boshqaruvchi institutlarning yirik loyihalarga bo‘lgan qiziqishini tasdiqlaydi.

Hukumat vakillari soni 26 nafardan 76 nafargacha ko‘paydi. Tadbirning markaziy voqeasi Shavkat Mirziyoyev, shuningdek, Albaniya, Rossiya, Ozarbayjon, Belarus, Qozog‘iston, Qirg‘iziston va Tojikistondan tashrif buyurgan yuqori martabali vakillar ishtirokidagi yalpi sessiya bo‘ldi. Uchrashuvlar davomida investitsiya masalalari transport, energetika va mintaqaviy savdoni rivojlantirish mavzulari bilan birgalikda ko‘rib chiqildi.

Forum doirasida jami 79 ta tadbir, jumladan, 34 ta panel muhokamasi, sakkizta pitch-sessiya va AQSH, Xitoy, Janubiy Koreya, Turkiya, Ozarbayjon, Saudiya Arabistoni hamda BAA delegatsiyalari bilan yettita ikki tomonlama uchrashuv o‘tkazildi. Muhokamalarning asosiy yo‘nalishlari qayta tiklanuvchi energetika, foydali qazilmalar qazib olish, logistika, davlat boshqaruvini raqamlashtirish, sun’iy intellekt, islom bankchiligi va oziq-ovqat xavfsizligidan iborat bo‘ldi.

Shu bilan birga, O‘zbekiston investitsiya salohiyatining ikkinchi ko‘rgazmasi ham faoliyat yuritib, qishloq xo‘jaligi, yengil sanoat, IT sohasi, geologiya va mashinasozlikdagi zamonaviy ishlab chiqarish quvvatlarini namoyish etdi.

Mamlakatda biznes bilan institutsional muloqot Xorijiy investorlar kengashi orqali ham davom etmoqda. Hozirda kengash tarkibiga 19 ta davlatdan 85 ta kompaniya kiradi. Kengash faoliyati doirasida sakkizta normativ-huquqiy hujjat qabul qilingan va ishbilarmonlik muhitini yaxshilash bo‘yicha 21 ta taklif ishlab chiqilgan.