Deputatlarga tashabbusli loyihalar uchun qariyb 500 mlrd so‘m ajratiladi

Prezident qaroriga ko‘ra, 2026-yil 1-yanvardan boshlab deputatlar o‘z saylov hududida “Open budjet” tizimida g‘olib bo‘lmagan, ammo aholi va hududlar rivojlanishi uchun muhim deb topilgan ikkitadan loyihani tanlash huquqiga ega bo‘ladi. Ushbu loyihalarni moliyalashtirish uchun respublika byudjetidan har yili 494 mlrd so‘m ajratiladi.

Har bir deputat uchun 8 ming BHM (3,2 mlrd so‘m) miqdorida mablag‘ ko‘zda tutilgan bo‘lib, bu har mavsumga bittadan loyihani amalga oshirish imkonini beradi. Parlamentarilar tomonidan tashabbuslarning tanlanishi, ularni davlat byudjeti hisobidan amalga oshirish uchun asos bo‘ladi.

Shaffoflikni ta’minlash maqsadida “Open budjet” portalida ushbu toifadagi loyihalar ro‘yxati bilan alohida sahifa yaratiladi. Fuqarolar deputatlar tomonidan qo‘llab-quvvatlangan barcha tashabbuslarni kuzatib borish imkoniyatiga ega bo‘ladi.

Shuningdek, Oliy Majlis Qonunchilik palatasida 11 nafar deputatdan iborat parlament komissiyasi tashkil etiladi. Mazkur komissiya jarayonni muvofiqlashtirish, loyihalarni moliyalashtirish va amalga oshirilishini nazorat qilish vazifalarini bajaradi.