Sea Breeze loyihasi ekologik baholashning ikki bosqichidan o‘tdi

Tekshiruvlar natijasida loyiha hududida ekologik talablarning buzilishi aniqlanmadi

Sea Breeze loyihasining atrof-muhitga ta’sirini baholashning birinchi va ikkinchi bosqichlari yakunlandi. Ular bo‘yicha davlat ekologik ekspertizasining xulosalari olindi. Bu haqda Ekologiya va iqlim o‘zgarishi milliy qo‘mitasi matbuot xizmati xabar berdi.

Birinchi bosqichda loyihaning atmosfera havosi, suv va yer resurslari, yashil hududlar, biologik xilma-xillik, chiqindilar hamda muhandislik infratuzilmasiga potensial ta’siri baholanadi. Shuningdek, yuzaga kelishi mumkin bo‘lgan ekologik xavflar va ularni kamaytirish choralari aniqlanadi.

Ikkinchi bosqichda loyiha yechimlarining ta’siri batafsilroq baholanadi. Jarayon davomida ta’sir parametrlari, tabiatni muhofaza qilish va kompensatsiya choralari, qurilish ishlariga qo‘yiladigan talablar, chiqindilar bilan ishlash, suvdan foydalanish va hududni ko‘kalamzorlashtirish masalalari aniqlashtiriladi.

Ekologik baholash jarayoniga oid materiallar, kelib tushgan fikr va takliflar, shuningdek, tegishli tushuntirishlar ochiq foydalanish uchun e’lon qilinmoqda. Bu loyihaning ekologik jihatdan kuzatilishi va jamoatchilikning jarayondagi ishtirokini ta’minlash imkonini beradi.

Loyiha hududida ekologik talablar nazorat qilinmoqda

Qurilish yakunlangach, ekologik baholashning yakuniy bosqichi o‘tkaziladi. U obyekt foydalanishga topshirilishidan oldin amalga oshiriladi va bajarilgan loyiha yechimlarining avval kelishilgan ekologik shartlarga muvofiqligi hamda ko‘zda tutilgan tabiatni muhofaza qilish choralari bajarilganini tekshirish imkonini beradi.

Ekologik talablarga rioya etilishini Jamoatchilik kengashi ham kuzatib bormoqda. Uning vakillari loyiha hududiga chiqib, hududning holati, qurilish ishlariga qo‘yilgan shartlarga rioya etilishi, chiqindilar bilan ishlash, yashil hududlarning holati va tabiatni muhofaza qilish choralari bajarilishini baholamoqda.

Bugungi kungacha o‘tkazilgan tashriflar yakunlariga ko‘ra, belgilangan ekologik talablarga rioya qilinmagan holatlar aniqlanmagan.

Loyiha amalga oshirilishining keyingi bosqichlarida ham monitoring davom ettiriladi.