O‘zbekiston Xitoy bilan hamkorlikda “Samarkand-2028” sun’iy yo‘ldoshini ishlab chiqadi

Uzcosmos va Xitoyning “Star.Vision” kompaniyasi sun’iy yo‘ldosh yechimlari bo‘yicha hamkorlik memorandumi imzoladi. Bu haqda agentlik matbuot xizmati xabar berdi.

Qo‘shma giperspektral missiya doirasida tomonlar “Samarkand-2028” nomi beriladigan sun’iy yo‘ldoshni ishlab chiqadi. Ushbu loyiha O‘zbekistonning milliy kosmik ambitsiyalarini kuchaytirish va Yerning masofadan zondlanishi bo‘yicha imkoniyatlarini oshirishga qaratilgan.

Hamkorlikda alohida e’tibor “Qishloq xo‘jaligida masofaviy zondlash bo‘yicha milliy tashabbus”ga qaratilgan. Uning doirasida ekinlarni aniq monitoring qilish uchun sun’iy intellektni birgalikda yaratish, shuningdek, bilim almashinuvi va o‘zbek mutaxassislarini tayyorlash bo‘yicha dasturlarni amalga oshirish ko‘zda tutilgan.

Qo‘llaniladigan texnologiyalar oziq-ovqat xavfsizligini ta’minlash uchun zarur bo‘lgan masshtablanadigan raqamli modellarning yaratilishiga imkon beradi. Ular yordamida paxta va bug‘doy dalalarining batafsil xaritalari tuziladi.

Sun’iy yo‘ldoshga nom tanlanishi xalqaro astronavtika kongressi bilan bog‘liq. U 2028-yilda Samarqandda o‘tkaziladi va Markaziy Osiyoda o‘z turidagi birinchi tadbir bo‘ladi.