Korrupsiyaga qarshi kurashish agentligi “Uzbekistan Airports” tenderini bekor qildi

Korrupsiyaga qarshi kurashish agentligi tomonidan 6,8 mlrd so‘mlik davlat xaridini amalga oshirish jarayonida qonun hujjatlari talablari buzilgani aniqlangan.

“Uzbekistan Airports” AJ buyurtmachiligida “bodi-kameralarni yetkazib berish, o‘rnatish va ishga tushirish xizmatini ko‘rsatish” yuzasidan o‘tkazilgan davlat xaridida qator qonunbuzilish holatlari sodir etilgani ma’lum bo‘ldi. Tekshiruv davomida g‘olibni aniqlashda jiddiy qonunbuzarliklarga yo‘l qo‘yilgani ma’lum bo‘ldi.

Xususan, ishtirokchilarning takliflari to‘liq va xolisona baholanmagan, tanlovda esa o‘zaro affillangan kompaniyalar qatnashgan. Shuningdek, baholash jarayonida bir qator xatolarga yo‘l qo‘yilgan.

Agentlik taqdimnomasiga asosan komissiya tomonidan g‘olibni tanlash haqidagi bayonnomalar haqiqiy emas deb topildi. Bu noqonuniy xaridning amalga oshishiga yo‘l qo‘ymadi.

Yig‘ilgan materiallar qonuniy choralar ko‘rilishi uchun huquqni muhofaza qiluvchi organlarga yuborildi.