Bektemirdan Chorvoqgacha bo’lgan yo’lning bir qismi pullik bo’lishi rejalashtirilgan

Turkiyaning “Onur Group” kompaniyasi 4R12 avtomobil yo’lining Bektemir — Chirchiq — G’azalkent — Chorbog’ (677 km) uchastkasini asfalt-beton qoplamali pullik yo’lga aylantirish rejalari bilan rekonstruksiya qilishni rejalashtirmoqda. Bu haqda iqtisodiyot va moliya vazirligi xabar bermoqda.

Joriy yilning 20 sentyabr kuni kompaniya direktori Byulent Tatar va vazirlik rahbariyati o’rtasidagi uchrashuvda kompaniyaning qurilish va muhandislik ishlari sohasidagi faoliyat yo’nalishlari muhokama qilindi. 

Ko’priklar, tunnellar, to’g’onlar, aeroportlar, tramvay liniyalari va temir yo’llarni qurish loyihalariga va shahar infratuzilmasini rivojlantirish bilan bog’liq masalalarga alohida e’tibor qaratildi. 

Kompaniya, shuningdek, Yevropa tiklanish va taraqqiyot banki, Jahon banki va Osiyo taraqqiyot banki kabi yirik investitsiya institutlari tomonidan moliyalashtiriladigan loyihalar uchun o’z xizmatlari haqida ma’lumot taqdim etdi. Xususan, 4R12 Bektemir — Chirchiq — G’azalkent — Chorbog’ (677 km) avtomobil yo’li uchastkasini asfalt-beton qoplamali pullik yo’lga aylantirish rejalari bilan rekonstruksiya qilish muhokama qilindi. 

“Onur Group” o’zining qurilish loyihalarini Turkiya, Ukraina, Xorvatiya, Tunis, Moldova, Saudiya Arabistoni, Ummon, Qatar, Ekvatorial Gvineya va Turkmanistonni o’z ichiga olgan 13 mamlakatda amalga oshirmoqda.