Transport vaziri O’zbekistonda pullik yo’llar qurilishining ahamiyatini tushuntirdi

O‘zbekistonda bir necha yildan beri muhokama qilinayotgan pullik avtomobil yo‘llari bo‘yicha dastlabki yirik loyihalar — Toshkent–Andijon va Toshkent–Samarqand yo‘llari — 2026 yil boshida amalda ishga tushishi rejalashtirilmoqda. Bu haqda Transport vaziri o‘rinbosari Jasurbek Choriev xalqaro anjumandagi chiqishida ma’lum qildi.

So‘nggi besh–olti yil O‘zbekiston uchun davlat-xususiy sheriklik loyihalarida ulkan tajriba to‘plash davri bo‘ldi. Avval biz bunday yirik loyihalarni juda tez amalga oshirish mumkin deb o‘ylardik, ammo jarayon murakkab ekani ma’lum bo‘ldi. Hozir esa texnik va institutsional tayyorgarligimiz ancha yuqori, — dedi Choriev.

Uning ta’kidlashicha, yirik davlat-xususiy sheriklik loyihalarini boshlash kechikayotganiga qaramay, bu vaqt davomida hukumatning texnik salohiyati, xalqaro moliya institutlari bilan hamkorlik mexanizmlari va xususiy sektor bilan ishonch mustahkamlangan.

Biz o‘z aktivlarimizni ‘oilaviy qadrdon boylik’ sifatida ko‘rib, ularga xususiy sektorni yaqinlashtirishdan cho‘chirdik. Xususiy sektor esa: “Yangi hukumat bizni tushunadimi?” degan savollar bilan ehtiyotkor bo‘ldi. Muvozanat topish vaqt oldi, — dedi u.

Toshkent–Andijon va Toshkent–Samarqand loyihalari: asosiy ma’lumotlar

Jasurbek Chorievning so‘zlariga ko‘ra:

• Toshkent–Samarqand avtomobil yo‘li qiymati $2,1 mlrd;
• Toshkent–Andijon loyihasi esa $4 mlrd atrofida baholanmoqda.

Yo‘nalishlar bo‘yicha oldingi texnik-iqtisodiy asoslar qayta ko‘rib chiqilgan, ekologik va moliyaviy yechimlar optimallashtirilgan, tunellar va ko‘priklar bo‘yicha xarajatlar qayta hisoblangan.

Biz endi aniq bilamiz — nimani va qanday qurmoqchimiz. Bozor ishtirokchilari bilan ishonch mustahkamlandi, yirik banklar bilan ishlash tizimi shakllandi. Hozir biz burilish nuqtasidamiz, — dedi vazir o‘rinbosari.

Nega bu loyihalar zarur?

Transport vazirligi vakilining aytishicha, asosiy maqsad — mamlakat ichida transport samaradorligini oshirish.

Aholi soni o‘smoqda, iqtisodiyot o‘smoqda, trafik esa so‘nggi besh yilda to‘rt baravar oshdi. Bu xususiy sektor uchun ham kuchli signal. Biz yo‘l vaqtini ikki baravar qisqartirmoqchimiz, tranzit salohiyatni kuchaytirmoqchimiz, — dedi Choriev.

Uning qayd etishicha, Toshkent, Andijon va Samarqand — mamlakatning iqtisodiy arteriyalari. Murakkab relyefga qaramay, yo‘nalishlar optimal xarajat va ekologik talablarni inobatga olgan holda yangidan ishlab chiqilgan.

Moliyalashtirish manbalari

Vazir o‘rinbosariga ko‘ra, loyihalar davlat-xususiy sheriklik modeli asosida amalga oshiriladi va unda xalqaro moliya institutlari, xususiy investorlar, hukumat kafolatlari ishtirok etadi.

Bu 20–30 yillik hamkorlik, bunda hukumat barqarorlik kutadi, xususiy sektor esa o‘z investitsiyasidan foyda olishi kerak, — dedi u.