Prezident Urganch–Xiva yangi pullik avtomobil yo‘li bilan tanishdi

Prezident Shavkat Mirziyoyev Xiva shahrida tadbirkorlar bilan ochiq muloqotdan so‘ng Urganch–Xiva yangi pullik avtomobil yo‘li bilan tanishdi.

Loyiha doirasida 35 kilometr to‘rt tasmali avtomobil yo‘li, yer osti tunneli, 8 ta yo‘l o‘tkazgich, 15 ta ko‘prik va 106 ta suv o‘tkazish inshooti barpo etilgan.

Yangi magistral orqali Urganchdan Xivaga yetib borish vaqti 45–50 daqiqadan 15–17 daqiqagacha qisqaradi. Yo‘l sutkasiga 30 mingdan ortiq transport vositasini o‘tkazish imkoniyatiga ega.

Transport oqimi va to‘lovlarni boshqarish sun’iy intellektga asoslangan raqamli tizim orqali amalga oshiriladi. To‘lovlar avtomobillarni to‘xtatmagan holda elektron tarzda undiriladi.

Yo‘l bo‘yida xalqaro standartlarga mos servis obyektlarini tashkil etish ham rejalashtirilgan. Magistralda issiq iqlimga chidamli maxsus modifikatsiyalangan bitumdan foydalanilgan bo‘lib, yo‘l qoplamasining umumiy qalinligi 87 santimetrni tashkil etadi.

Yangi yo‘l Urganch va Xiva o‘rtasidagi qatnovni tezlashtirish, yo‘lovchilar va sayyohlar uchun transport qulayligini oshirishga xizmat qiladi.

Shu bilan Prezident Shavkat Mirziyoyevning Xorazm viloyatiga tashrifi yakunlandi, davlatimiz rahbari Toshkentga jo‘nab ketdi, deyiladi matbuot xizmati xabarida.

Kapital.uz fevral oyida Urganch-Xiva yo‘nalishida birinchi pulli avtomobil yo‘lini qurish boshlangani haqida xabar bergandi.

Loyiha mamlakatda yo‘l infratuzilmasini yangi bosqichga olib chiqishga qaratilgan bo‘lib, xalqaro standartlar asosida amalga oshirilmoqda. Yangi yo‘l asfalt-beton qoplama asosida, to‘rt tasmali shaklda quriladi. Uning o‘tkazuvchanlik qobiliyati sutkasiga 20 mingdan ortiq transport vositasini tashkil etishi kutilmoqda.

Xorazm viloyati avtomobil yo‘llari boshqarmasi boshlig‘i Dilshodbek Niyozmetovning ma’lum qilishicha, loyiha beshta lotga bo‘lingan va bir nechta quruvchi tashkilotlar jalb etilgan.