Navoiy viloyatidagi “Pirali” kon uchastkasi 99 mlrd so‘mga sotildi

21-avgust kuni E-auksion platformasida Navoiy viloyatining oltinga boy “Pirali” uchastkasida geologik izlanishlar olib borish huquqi savdoga qo‘yildi.

20-avgust kuni boshlangan auksion 23 soat 29 daqiqa davom etdi va 461 qadamdan so‘ng yakunlandi. Natijada g‘olib “NBK 111” kompaniyasi bo‘ldi. U 99,09 mlrd so‘mlik ($7,9 mln) taklif kiritib, boshlang‘ich narx — 4,12 mlrd so‘mdan (taxminan $330 ming) qariyb 24 barobar yuqori summa taklif etdi.

“Pirali” uchastkasi Navbahor tumanida, Zafarobod shaharchasidan 20,5 km shimoli-g‘arbda va Navoiy shahridan 38,5 km shimolda joylashgan. Maydoni 484 gektar bo‘lib, taxminiy oltin zaxiralari 2,4 tonna deb baholanmoqda.

KTYADR ma’lumotlariga ko‘ra, “NBK 111” kompaniyasi 2024-yil may oyida Toshkentda tashkil etilgan bo‘lib, rangli metall rudalarini qazib olish faoliyati bilan shug‘ullanadi. Korxonaning ustav fondi 1,005 mlrd so‘mni tashkil etadi.

Ustav kapitalining 40%i xitoylik Chjan Syan, qolgan 60%i esa Nurmaxammad Pulatovga tegishli. Pulatov, shuningdek, Jizzaxdagi “Quwwatt Group” (shisha ishlab chiqarish) kompaniyasida 90,7% ulush va BEEK Electro (maishiy texnika ishlab chiqarish) korxonasida 100% ulushga ega.