O‘zmiliybank tijorat ko‘chmas mulkini developerlardan sotib olish uchun 500 mlrd so‘m yo‘naltiradi

O‘zbekiston Milliy banki to‘g‘ridan-to‘g‘ri developerlardan tijorat ko‘chmas mulkini sotib olish va keyinchalik uni tadbirkorlarga imtiyozli shartlarda ijaraga yoki lizingga berish uchun 500 mlrd so‘m sarmoya kiritadi. 

Prezident Shavkat Mirziyoyev bu sohada vositachilik vazifasini tijorat banklari bajarishi haqidagi tashabbusni qo‘llab-quvvatladi. Moliyaviy muassasalar quruvchilardan ko‘chmas mulkni to‘g‘ridan-to‘g‘ri sotib olib, biznesga qulay shartlarda ijaraga yoki lizingga berishi mumkin bo‘ladi.

Markaziy bank raisi Timur Ishmetovga quruvchilar bilan hamkorlikda bo‘sh turgan noturar joylarni lizing asosida berish bo‘yicha umumiy qiymati 4 trln so‘mlik loyihalar to‘plamini tayyorlash vazifasi topshirildi. Mazkur loyihalarning amalga oshirilishi 50 ming kvadrat metr tijorat ko‘chmas mulkini iqtisodiy aylanmaga jalb etish va 100 mingga yaqin ish o‘rinlarini yaratish imkonini berishi kutilmoqda.

O‘zbekiston Milliy banki raisi Alisher Mirsoatov “O‘zbekiston 24” telekanaliga bergan intervyusida prezident bankka xizmat ko‘rsatish sohasida 3 mln kishini ish bilan ta’minlashga ko‘maklashish vazifasini yuklaganini ta’kidladi, ularning yarmi Toshkentga to‘g‘ri keladi.