O‘zbekistonda oziq-ovqat mahsulotlari iyulda qariyb 1% arzonlashdi

2026-yil iyul oyida O‘zbekistonda oziq-ovqat mahsulotlari narxi iyun oyiga nisbatan 0,9%ga pasaydi. Biroq yillik hisobda ularning qiymati hali ham 6,4%ga yuqori bo‘lib qolmoqda. Bu haqda Milliy statistika qo‘mitasi hisobotida ma’lum qilindi.

Narxlarning pasayishiga asosan sabzavot, meva va poliz mahsulotlarining mavsumiy arzonlashuvi sabab bo‘ldi. Iyul oyida eng katta pasayish baqlajon (-42,8%), bulg‘or qalampiri (-39,4%), pomidor (-24%), tarvuz (-20,3%), kartoshka (-18%), qovun (-14,5%), shaftoli va bodring (har biri -10,6%), shuningdek, sarimsoq (-10%) narxlarida kuzatildi. Tuxum 5%ga, suyakli mol go‘shti esa 0,1%ga arzonlashdi.

Shu bilan birga, ayrim oziq-ovqat mahsulotlari qimmatlashishda davom etdi. Guruch va guruch yormasi narxi 5,9%ga, sabzi 12,6%ga, piyoz 1,7%ga, shakar va pasterizatsiyalangan sut har biri 0,8%ga oshdi. Suyaksiz mol go‘shti 0,6%ga, un 0,5%ga, qo‘y go‘shti va paxta yog‘i 0,4%ga, parranda go‘shti esa 0,3–0,4%ga qimmatlashdi.

Yillik hisobda eng katta o‘sish qo‘y go‘shti (+20,9%), suyaksiz mol go‘shti (+18,8%), suyakli mol go‘shti (+16%) va tuxum (+15%) narxlarida qayd etildi. Sabzavot va mevalar orasida pomidor (+30,5%), bulg‘or qalampiri (+17,6%), qovun (+14,4%) hamda shaftoli (+12,9%) eng ko‘p qimmatlashdi. Aksincha, baqlajon bir yil ichida 31%ga, sarimsoq 27,5%ga, piyoz 16,5%ga, sabzi 13,3%ga, kartoshka 9,3%ga, guruch 6,3%ga va bodring 5,8%ga arzonlashdi.

Nooziq-ovqat mahsulotlari narxining iyuldagi o‘sishiga asosan avtomobil yoqilg‘isi sabab bo‘ldi. Benzin narxi oy davomida o‘rtacha 4,8%ga, yillik hisobda esa 21,7%ga oshdi. AI-98 va AI-100 markali benzin narxi 10%ga, AI-95 — 8,5%ga, AI-92 esa 3,9%ga qimmatlashdi.

Shuningdek, propan narxi oy davomida 1,7%ga, yil davomida 34,6%ga oshdi. Metan esa mos ravishda 0,3% va 10,3%ga qimmatlashdi. Kiyim-kechak va poyabzal narxlari 0,1%ga, maishiy texnika va uy-ro‘zg‘or buyumlari 0,2%ga, alkogol va tamaki mahsulotlari esa 0,7%ga oshdi.

Xizmatlar sohasida eng katta o‘sish Farg‘ona viloyatida maishiy chiqindilarni olib chiqish tariflari oshirilgani sabab kuzatildi. Natijada ushbu xizmat narxi oy davomida o‘rtacha 2,7%ga, yillik hisobda esa 25,6%ga ko‘tarildi. Ko‘p qavatli uylarni boshqarish xizmatlari 0,6%ga, uy-joyni ta’mirlash va qo‘riqlash xizmatlari 0,8%ga, ijara narxlari esa 0,3%ga oshdi.

Transport xizmatlari segmentida Toshkent viloyatida shahar avtobuslari yo‘l haqi 15%ga oshirilgani mamlakat bo‘yicha o‘rtacha 1,4%lik o‘sishni ta’minladi. Shaharlararo avtobus qatnovi 0,6%ga, uzoq masofali poyezd chiptalari 0,4%ga, xalqaro aviaqatnovlar esa 0,2%ga qimmatlashdi. Shu bilan birga, o‘zbek so‘mining yevroga nisbatan mustahkamlanishi hisobiga ichki aviachipta narxlari 0,9%ga arzonlashdi.

Boshqa xizmatlar orasida axborot va aloqa xizmatlari narxi oy davomida 1,1%ga oshdi. Restoran va mehmonxona, tibbiy, sug‘urta hamda moliyaviy xizmatlar 0,3%ga qimmatlashdi. Yillik hisobda esa moliyaviy xizmatlar narxi 43,6%ga oshgan.