O‘zbekiston va Bahrayn diplomatik pasport egalari uchun vizasiz rejim joriy etdi

O‘zbekiston va Bahrayn tashqi ishlar vazirlari Diplomatik pasport egalari uchun vizalarni bekor qilish to‘g‘risidagi bitimni imzoladi.

Tashqi ishlar vaziri Baxtiyor Saidov Manamaga rasmiy tashrifi doirasida Bahrayn tashqi ishlar vaziri Abdullatif bin Rashid al-Zayani bilan uchrashdi. Uchrashuvda diplomatik pasport egalari uchun vizalarni bekor qilish to‘g‘risidagi bitim imzolangan.

Hamkorligimiz zamirida yotgan do‘stlik va o‘zaro hurmat ruhini yuksak qadrlaymiz. Bugungi muhokamalarimizga asoslanib, umumiy g‘oyalarimizni har ikki mamlakatimiz manfaatiga xizmat qiladigan aniq tashabbuslarga aylantirishni intiqlik bilan kutamiz, deb yozdi O‘zbekiston TIV rahbari.

Iyun oyidan boshlab O‘zbekistonda Bahrayn Qirolligi, Quvayt Davlati va O‘mon Sultonligi fuqarolari uchun vizasiz rejim belgilangandi. Bunda sayyohlar mamlakat hududiga kirgan kundan e’tiboran 30 kun muddatda qolishlariga ruxsat berilgan.