O‘zbekiston va Rossiya JSTga a’zo bo‘lish bo‘yicha muzokaralarni amalda yakunladi

O‘zbekiston Rossiya bilan Jahon savdo tashkilotiga a’zo bo‘lish bo‘yicha muzokaralarni deyarli yakunladi. Bu haqda prezidentning JST bo‘yicha vakili Azizbek Urunov 24-noyabr kuni o‘zining LinkedIndagi sahifasida ma’lum qildi.

Biz Moskvada O‘zbekistonning JSTga a’zo bo‘lishining hal qilinmagan masalalari bo‘yicha kelishuvga erishish uchun Rossiya muzokaralar guruhi bilan juda samarali uchrashuv o‘tkazdik. Muzokaralar deyarli yakunlandi: barcha muhim elementlar kelishib olindi va faqat bir nechta texnik bandlar yakuniy tekshiruv va tasdiqlashni talab qiladi, — deya qayd etdi Azizbek Urunov.

U Vazir Maksim Reshetnikov, direktor Yekaterina Mayorova, elchi Nikolay Platonov va butun Rossiya jamoasiga asosiy so‘rovlar bo‘yicha aniq pozitsiyasi, shuningdek, butun jarayon davomida konstruktiv yondashuvi va qo‘llab-quvvatlashi uchun samimiy minnatdorlik bildirdi.

JST vakilining so‘zlariga ko‘ra, Rossiya bilan ikki tomonlama muzokaralarning yakuni dekabr oyida Jenevada bo‘lishi kutilmoqda.

Rossiya yo‘nalishi yopilgandan so‘ng O‘zbekistonga faqat Xitoy Taypeyi bilan muzokaralarni yakunlash qoladi.

Shundan so‘ng bizda faqat Xitoy Taypeyi (Tayvan) bilan ikki tomonlama muzokaralarni yakunlash qoldi. Bu hafta men o‘z jamoam bilan Vashingtonda bo‘lib, hamkorlarimiz bilan uchrashuvlar o‘tkazaman va JST doirasidagi ikki tomonlama hamkorlik va o‘zaro aloqalarni ilgari suraman, — dedi Azizbek Urunov.