Yakkasaroy va Mirzo Ulug‘bek tumanlarida noqonuniy qurilishlar va reklama inshootlarini buzish ishlari boshlandi

Yakkasaroy tumani hokimligi Toshkentning markaziy ko‘chalarida joylashgan bir nechta noqonuniy qurilmalarni bartaraf qilinishi haqida ma’lum qildi.  

Ta’kidlanishicha, tadbirkorlar tomonidan egallangan yerlar piyodalar harakatiga to‘sqinlik qilgan. Reyd davomida hokim Nilufar Allabergenova barcha o‘zboshimchalik bilan qurilgan obyektlarni buzish bo‘yicha ko‘rsatma berdi. Hokimlik ma’lumotiga ko‘ra, yozgi ayvonlar, reklama konstruksiyalari va boshqa inshootlar demontaj qilingan.  

Shuningdek, joriy yilning 24-yanvar kuni Mirzo Ulug‘bek tumani hokimligi noqonuniy obyektlarni buzish bo‘yicha shunga o‘xshash tadbirlar o‘tkazilganini xabar qildi. Telegram-kanalda e’lon qilingan videoda “Centrum Air Sales” binosi yonidagi to‘siqlar, “Oqtepa Lavash” va “Bellissimo Pizza” reklama yozuvlari hamda boshqa bir qator inshootlar olib tashlangani ko‘rsatilgan. Ma’lumotda bu kabi reydlar shaharning obodonlashtirilishi, ko‘chalardagi xavfsizlik darajasini oshirish va reklama qoidalariga rioya qilishga qaratilgani qayd etilgan.  

Eslatib o‘tamiz, o‘tgan yilning 11-noyabr kuni Toshkentda noqonuniy tashqi reklamalarni olib tashlash bo‘yicha reyd o‘tkazilgan edi. Mirabad tumanida Shahrisabz, Islom Karimov, Nukus va Farg‘ona yo‘li ko‘chalarida 120 dan ortiq reklama bannerlari va stendlari olib tashlangan edi.  

Yakkasaroy tumanida Nukus va Bobur ko‘chalari kesishmasida joylashgan 16 qavatli uyning fasadidagi reklama banneri olib tashlangan. Bu qaror aholi murojaatlarini tahlil qilgan holda vakolatli organlar tomonidan qabul qilingan. Shuningdek, Chilonzor tumanida ko‘p qavatli uylarga o‘rnatilgan bannerlar olib tashlangan.