Toshkent markazida 5 ta ko‘p qavatli bino ruxsatsiz qurilgani aniqlandi

Tarmoqlarda 2-avgust kuni New Port turar joy majmuasi mansabdor shaxslari Damariq MFY, Abdulla Qahhor ko‘chasi 19-uyda yashovchi fuqarolarga kompensatsiya pullari to‘liq to‘lanmayotgani va uy noqonuniy buzilayotgani haqida videomurojaat tarqalgan edi.

Toshkent shahar prokuraturasi o‘tkazgan tergovga qadar tekshiruvda Mega Logistics Servise MCHJ mansabdor shaxslari mazkur manzildagi fuqarolarni majburiy ko‘chirish bo‘yicha ijro harakatlari yakunlanmagan bo‘lsa-da, uyni o‘zboshimchalik bilan buzib tashlagani aniqlangan.

Shuningdek, kompaniya qurilishga tegishli ruxsatnoma olmasdan ushbu hududda 1 ta 20 qavatli, 2 ta 19 qavatli, 1 ta 12 qavatli va 1 ta 2 qavatli turar joy binosini o‘zboshimchalik bilan qurgani ma’lum bo‘lgan.

Tekshiruv yakunlariga ko‘ra, Mega Logistics Servise MCHJ mansabdor shaxslari va boshqa shaxslarga nisbatan jinoyat ishi qo‘zg‘atildi. Dastlabki tergov Toshkent shahar prokuraturasi tomonidan olib borilmoqda.

Prokuratura ma’lum qilishicha, jinoyat ishi tergovi alohida nazoratga olingan va uning yakuni bo‘yicha qonuniy qaror qabul qilinadi.