Markaziy bank: Valyuta birjasidagi savdolar muddati 7 soatga uzaytiriladi

10-avgustdan boshlab O‘zbekiston Respublika valyuta birjasida kunlik savdo sessiyalari muddati yetti soatgacha uzaytiriladi. Bu haqda Markaziy bank matbuot xizmati ma’lum qildi.

Qayd etilishicha, 10-avgust, dushanba kunidan boshlab birjadagi savdolar avvalgi 5 soat o‘rniga 7 soat davom etadi. Yangi jadvalga ko‘ra, savdolar har kuni soat 10:00 dan 17:00 gacha o‘tkaziladi.

Markaziy bankning ta’kidlashicha, ushbu o‘zgarish tijorat banklariga kun davomida valyuta mablag‘larini yanada samarali boshqarish imkonini beradi. Natijada banklar mijozlarning topshiriqlari bo‘yicha hisob-kitoblarni o‘z vaqtida amalga oshirishi va xorijiy valyutadagi operatsiyalar uzluksiz bajarilishini ta’minlashi mumkin bo‘ladi.

Shuningdek, xorijiy valyutalarning o‘zbek so‘miga nisbatan amaldagi kurslari Markaziy bankning rasmiy veb-saytida soat 17:30 da e’lon qilinadi.

Mazkur ma’lumotlar bank regulyatorining valyuta kurslari arxiviga bag‘ishlangan bo‘limida joylashtiriladi. E’lon qilingan kurslar buxgalteriya hisobi, statistik hisobotlarni tayyorlash, shuningdek bojxona va soliq to‘lovlarini hisoblashda qo‘llaniladi.