Toshkendagi Mirobod dehqon bozori atrofi obodonlashtirilmoqda

Toshkent shahridagi Mirobod dehqon bozori (“Gospitalniy”) atrofi hududida obodonlashtirish va ko‘kalamzorlashtirish ishlari boshlandi. Bu haqda Mirobod tumani hokimligi xabar qildi.

Hokimlik ma’lum qilishicha, loyiha doirasida bozor atrofi zamonaviy qiyofaga keltiriladi, piyodalar uchun qulay, toza va xavfsiz muhit yaratiladi. Ishlar bir oy ichida yakunlanishi rejalashtirilgan.

Qayd etilishicha, obodonlashtirish jarayonida mavjud daraxtlar kesilmaydi, aksincha, hududda yangi ko‘chatlar ekilib, yashil maydonlar kengaytiriladi.

Bozor faoliyati ishlar davomida ham belgilangan tartibda davom etadi. Tuman hokimligi fuqarolardan vaqtinchalik noqulayliklar uchun uzr so‘radi.