Tadbirkorlik sohasidagi majburiy talablarning yagona reyestri yuritiladi

17-avgust kuni tadbirkorlik faoliyatiga oid ayrim qonun hujjatlariga o‘zgartirish va qo‘shimchalar kiritildi. Tegishli qonun bilan tadbirkorlar zimmasidagi majburiy talablarni yagona reyestrda jamlash tartibi belgilandi.

“Tadbirkorlik faoliyati erkinligining kafolatlari to‘g‘risida”gi qonunga kiritilgan qo‘shimchalarga ko‘ra, tadbirkorlar qonunchilikda belgilangan tartibda energiya manbalariga ulanish va ulardan foydalanish huquqiga ega bo‘ladi.

Shuningdek, tadbirkorlarga yangi majburiyat, talab, taqiq, javobgarlik yoki boshqa cheklovlar yuklashni nazarda tutuvchi normativ hujjat loyihalari tadbirkorlar va ularning birlashmalari ishtirokida muhokama qilinishi kerak.

Qonunga ko‘ra, tadbirkorlik subyekti faoliyati uning arizasiga asosan, nazorat qiluvchi organlar tomonidan 10 ish kunidan ko‘p bo‘lmagan muddatga, sud tomonidan esa 10 ish kunidan ortiq, biroq 6 oydan ko‘p bo‘lmagan muddatga to‘xtatib turilishi mumkin.

Majburiy talablar reyestri tashkil etiladi

Tadbirkorlik faoliyatini amalga oshirish uchun normativ-huquqiy va normativ-texnik hujjatlarda belgilangan barcha majburiy talablar Majburiy talablar reyestriga kiritiladi.

Reyestrga ma’lumotlarni tegishli sohadagi vakolatli davlat organlari va tashkilotlari kiritadi. Adliya vazirligi esa reyestr operatori hisoblanadi.

Tadbirkorlar reyestrga kiritilmagan talablarni bajarmaganlik uchun javobgarlikka tortilmaydi.

Ijtimoiy tadbirkorlik davlat tomonidan qo‘llab-quvvatlanadi

Qonun bilan tadbirkorlik subyektlarining ijtimoiy va ekologik muammolarni hal etish yoki ularning oqibatlarini yumshatishga qaratilgan faoliyati ijtimoiy tadbirkorlik deb e’tirof etiladi.

Bunday faoliyat davlat tomonidan imtiyoz va preferensiyalar berish, ijtimoiy loyihalar xarajatlarini subsidiyalash, davlat ijtimoiy buyurtmasini joylashtirish, moliyaviy ko‘mak ko‘rsatish, xodimlarni tayyorlash va malakasini oshirish, shuningdek, maslahat va axborot yordami ko‘rsatish orqali qo‘llab-quvvatlanadi.

Shuningdek, qonunchilikka rioya qilish bilan birga barqaror rivojlanishga hissa qo‘shish, inson huquqlari, atrof-muhit va jamoat manfaatlariga salbiy ta’sirning oldini olishga qaratilgan faoliyat mas’uliyatli biznes yuritish deb belgilanadi.

Bunda inson huquqlariga rioya qilish, mehnat va ishlab chiqarish sohasida noqonuniy amaliyotlarga yo‘l qo‘ymaslik, atrof-muhit, xodimlar va aholi salomatligini muhofaza qilish mas’uliyatli biznesning asosiy mezonlari etib belgilangan.

Qonun rasmiy e’lon qilingan kundan 3 oy o‘tgach kuchga kiradi.