“Kafolat” aksiyalari yana “Toshkent” fond birjasida savdoga chiqariladi

“Toshkent” respublika fond birjasi “Kafolat” sug‘urta kompaniyasining oddiy va imtiyozli aksiyalari bo‘yicha savdolarni qayta tiklaydi. Bu haqda birja matbuot xizmati ma’lum qildi.

Shuningdek, fintex-kompaniya Plum Technologies aksiyalari ham ilk bor savdo maydonchasiga chiqariladi.

Har ikki kompaniyaning qimmatli qog‘ozlari kotirovka varag‘iga kiritilgan bo‘lib, ular bilan bitimlar 25-iyundan amalga oshirilishi mumkin. “Kafolat” aksiyalariga KFSK va KFSKP, Plum Technologies aksiyalariga esa PLTG tikkerlari biriktirilgan.

iHamkor platformasi ma’lumotlariga ko‘ra, hozirda Plum Technologies “Kafolat” sug‘urta kompaniyasining 100% ulushiga egalik qiladi.

2024-yil aprel oyida “Toshkent” fond birjasi boshqaruvi “Kafolat” aksiyalarini kotirovka varag‘ining “Standart” toifasidan chiqargan edi. Bunga kompaniyaning delisting bo‘yicha ixtiyoriy arizasi sabab bo‘lgan. Mazkur qaror aksiyadorlarning 2024-yil mart oyida bo‘lib o‘tgan yillik umumiy yig‘ilishida ma’qullangan.