Toshkent hokimligi “Kadishev” bozori buzilishi haqidagi xabarlarni rad etdi

Poytaxtdagi “Aviasozlar” savdo majmuasi (“Kadishev” bozori) hamda qonuniy savdo shoxobchalari buzilishi haqidagi xabarlar haqiqatga to‘g‘ri kelmaydi. Bu haqda Toshkent shahar hokimligi matbuot xizmati ma’lum qildi.

Shahar ma’muriyati bozordagi faoliyat odatdagi tartibda davom etayotganini ta’kidladi.

Qayd etilishicha, hozirda olib borilayotgan ishlar faqat bozorga tutash hududlarga taalluqli bo‘lib, u yerda uzoq vaqt davomida ruxsatnomasiz go‘sht, meva va sabzavot savdosi olib borilgan. Mazkur nuqtalarda sanitariya nazoratining yo‘qligi oziq-ovqat xavfsizligiga tahdid tug‘dirgan.

Shuningdek, noqonuniy rastalar piyodalar va transport harakatiga xalaqit berib, tirbandliklar hamda tartibsiz avtomobil to‘xtash holatlariga sabab bo‘lgan. Shu munosabat bilan noqonuniy obyektlarni olib tashlash to‘g‘risida qaror qabul qilingan.

Hududdan joyi bo‘shatilayotgan sotuvchilarga savdo majmuasi ichidan rasmiy savdo joylari taklif etilgan. Bo‘shatilgan maydonlarda esa ko‘kalamzorlashtirish ishlari olib borish va qonuniy avtoturargoh tashkil etish rejalashtirilgan. Bu yaqin atrofdagi ko‘chalardagi transport yuklamasini kamaytirishi va hududga xavfsiz kirish imkonini yaratishi kutilmoqda.

Yashnobod tumani hokimligi ham holat yuzasidan qo‘shimcha izoh berdi.

Ma’muriyat asosiy infratuzilma odatdagi tartibda ishlayotganini qayd etib, tartibga solish ishlari faqat norasmiy savdo nuqtalarini bartaraf etish va savdogarlarni maxsus ajratilgan xavfsiz hududlarga ko‘chirishga qaratilganini bildirdi.