Jahon banki O‘zbekiston iqtisodiyoti bo‘yicha o‘rta muddatli prognozlarini yaxshiladi

Jahon banki O‘zbekistonda iqtisodiy o‘sish bo‘yicha yanvar oyidagi prognozlarini ijobiy tomonga qayta ko‘rib chiqdi. Yangilangan raqamlar bankning 8-aprel kuni e’lon qilingan hisobotida keltiriladi.

2025-yil yakuniga ko‘ra O‘zbekiston YAIM o‘sishi bo‘yicha baho 1,5% bandga — 7,7% gacha oshirildi. Bu mintaqa davlatlar orasidagi eng sezilarli yaxshilanishlardan biri bo‘ldi, bundan yuqoriroq ko‘rsatkich faqat Qirg‘izistonda — +1,9% band bilan 11%.

O‘zbekiston YAIM o‘sishi bo‘yicha 2026-yilgi prognoz ham 0,4% bandga — 6,4% gacha yaxshilandi, 2027-yilgi prognoz esa 0,8% bandga — 6,7% gacha oshirildi. Shunday qilib, qayta ko‘rib chiqilgan prognozlar O‘zbekistonda iqtisodiy o‘sish dinamikasi o‘rta muddatli istiqbolda avval kutilganidan kuchliroq bo‘lishini ko‘rsatmoqda.

JB O‘zbekistonning muvaffaqiyatini oltinning yuqori narxlari, investitsion faollik, aholi daromadlarining ortishi, kreditlashning kengayishi va davom etayotgan tarkibiy islohotlar bilan izohlamoqda.

Mamlakatga pul o‘tkazmalari hajmi qariyb 37% ga o‘sib, $18,9 mlrdni (YAIMning taxminan 13% qismi) tashkil etdi, bunda barcha o‘tkazmalarning 78%i Rossiya hissasiga to‘g‘ri keldi.

Shu bilan birga, JB tahlilchilari mamlakatda mintaqaga xos bo‘lgan tarkibiy cheklovlar saqlanib qolayotganini qayd etadi: iqtisodiyotda davlatning salmoqli o‘rni va davlat korxonalarining ustunligi xususiy sektor rivojlanishini cheklashda davom etmoqda.