O‘zbekistonda elektromobil savdosi 10,8% ga oshdi

O‘zbekistonda 2026-yil iyul oyida birlamchi va ikkilamchi bozorlarda 9,3 mingta elektromobil sotildi. Bu haqda Iqtisodiy tadqiqotlar va islohotlar markazi ma’lum qildi.

Elektromobillar savdosi iyun oyiga nisbatan 10,8% ga oshdi. O‘sish mamlakatning aksariyat hududlarida qayd etilgan.

Savdolarning eng katta qismi Toshkent shahriga to‘g‘ri kelib, iyul oyida poytaxtda 6 mingta elektromobil sotildi. Toshkent viloyatida 699 ta, Farg‘ona viloyatida esa 428 ta elektromobil xarid qilingan.

Avtomobil savdosi 0,7% ga kamaydi

Iyul oyida barcha turdagi avtotransport vositalarining umumiy savdosi qariyb 80 ming tani tashkil etdi. Bu iyun oyiga nisbatan 0,7% ga kam.

Yengil avtomobillar savdosi deyarli o‘zgarmagan — iyulda 61,1 mingta avtomobil sotilgan. Iyun oyida bu ko‘rsatkich 61,4 mingta edi.

Yangi yengil avtomobillar savdosi esa 5,9% ga oshib, 25,4 ming donaga yetdi. O‘sish asosan mahalliy ishlab chiqarilgan avtomobillar savdosi hisobiga ta’minlangan.

Mahalliy avtomobillar savdosi 8,3% ga oshib, 20,4 ming donani tashkil etdi. Xorijda ishlab chiqarilgan yangi avtomobillar savdosi esa qariyb 3% ga kamayib, 5 ming donaga tushdi.

Ikkilamchi bozorda iyul oyida 35,7 mingta ishlatilgan yengil avtomobil sotildi. Bu iyun oyiga nisbatan 4,4% ga kam.