O‘zbekistonda pul massasi 437,7 trln so‘mga yetdi

2026-yil sentabr holatiga ko‘ra, O‘zbekistonda keng ma’nodagi pul massasi (M2) 437,7 trln so‘mni tashkil etdi. Bu haqda Markaziy bankning pul agregatlari bo‘yicha hisobotida ma’lum qilindi.

M2 muomaladagi naqd pullar bilan birga banklardagi talab qilib olinguncha va boshqa depozitlarni, shuningdek chet el valutasidagi depozitlarning so‘mdagi ekvivalentini qamrab oladi.

Pul massasining asosiy qismi depozitlarda saqlanmoqda

437,7 trln so‘mlik M2ning 365,7 trln so‘mi milliy valutadagi mablag‘larga, qariyb 72 trln so‘mi esa chet el valutasidagi depozitlarning so‘mdagi ekvivalentiga to‘g‘ri keladi.

Milliy valutadagi mablag‘larning 76,5 trln so‘mi muomaladagi naqd pullar, 88,9 trln so‘mi talab qilib olinguncha depozitlar, 200,3 trln so‘mi esa boshqa depozitlardan iborat.

Shu tariqa, boshqa milliy valutadagi depozitlar M2ning qariyb 46% ini tashkil qilgan.

Depozitlar naqd pullardan tezroq o‘sdi

2025-yil sentabrida milliy valutadagi boshqa depozitlar hajmi qariyb 139,2 trln so‘m bo‘lgan. Bir yil ichida ushbu ko‘rsatkich 61 trln so‘mga yoki 43,9% ga oshgan.

Taqqoslash uchun, shu davrda muomaladagi naqd pullar 24% ga, talab qilib olinguncha depozitlar esa 46,5% ga ko‘paygan.

2026-yil sentabrida muomaladagi naqd pullar 76,5 trln so‘mni tashkil etib, avgustga nisbatan 0,3%, yillik hisobda 24% ga oshgan. Uning M2dagi ulushi 17,5% atrofida bo‘lgan.

M1 165,5 trln so‘mni tashkil etdi

Sentabr oyida tor ma’nodagi pul massasi — M1 165,5 trln so‘mga yetdi.

U muomaladagi naqd pullar va talab qilib olinguncha depozitlardan shakllanadi. Ya’ni 76,5 trln so‘m naqd pul va 88,9 trln so‘m talab qilib olinguncha depozitlar jami 165,5 trln so‘mlik M1ni tashkil etgan.

13,5 yilda M2 qariyb 18 baravar oshdi

2013-yil fevralida O‘zbekistonda keng ma’nodagi pul massasi 24,4 trln so‘m bo‘lgan. 2026-yil sentabriga kelib bu ko‘rsatkich 437,7 trln so‘mga yetdi.

Shu tariqa, qariyb 13,5 yil ichida M2 17,9 baravar oshgan. Eng katta o‘sish milliy valutadagi boshqa depozitlarda qayd etilgan — ular 6,3 trln so‘mdan 200,3 trln so‘mgacha, ya’ni 31,7 baravar ko‘paygan.

Bu davrda milliy valutadagi jami pul massasi 19,4 baravar, M1 13,1 baravar, muomaladagi naqd pullar 13,3 baravar, talab qilib olinguncha depozitlar 13 baravar, chet el valutasidagi depozitlar esa 13 baravar oshgan.

Yil boshidan pul massasi 15,6 foizga ko‘paydi

2026-yil yanvarida M2 378,6 trln so‘mni tashkil etgan. Sentabrga kelib ko‘rsatkich 437,7 trln so‘mga yetib, yil boshidan 59,1 trln so‘m yoki 15,6% ga oshgan.

Shu davrda milliy valutadagi pul massasi 309 trln so‘mdan 365,7 trln so‘mga, M1 esa 144,7 trln so‘mdan 165,5 trln so‘mga ko‘paygan.

Chet el valutasidagi depozitlar sentabr oyida 1,8 foizga kamaygan bo‘lsa-da, yillik hisobda 14,8% ga oshgan.