IT Park Uzbekistanga yangi bosh direktor tayinlandi

IT Park Uzbekistan bosh direktori lavozimiga Azamat Karamatov tayinlandi. Bu haqda texnopark matbuot xizmati xabar berdi. U mazkur lavozimda bir yildan ortiq faoliyat yuritgan Abdulakhad Kuchkarov o‘rnini egalladi.

Yangi rahbar zimmasiga IT sohasini rivojlantirish, startap va venchur loyihalarni qo‘llab-quvvatlash, rezidentlar bilan ishlash, shuningdek texnologik xizmatlar eksportini kengaytirish hamda xorijiy kompaniyalarni O‘zbekistonga jalb etish vazifalari yuklatilgan.

Ochiq manbalarga ko‘ra, Azamat Karamatov 2024-yil noyabridan buyon IT Park Ventures venchur fondiga rahbarlik qilgan. U Rahmat, Jett, Multicard Payment kabi servislarni yaratish jarayonlarida hamda Semurg VC venchur fondini shakllantirishda ishtirok etgan. Shuningdek, u Uzcard, “O‘zbektelekom”, Raqamli texnologiyalar vazirligi va Aloqa Ventures fondida faoliyat yuritgan.

Texnoparkning yangi rahbari Toshkent axborot texnologiyalari universiteti hamda Prezident huzuridagi Davlat boshqaruvi akademiyasi bitiruvchisi hisoblanadi.

Bosh direktor tayinlanishi bilan birga yangilangan rahbariyat tarkibi ham taqdim etildi:

• birinchi o‘rinbosar — Jahongir Rajabov;
• rezidentlar bilan ishlash bo‘yicha direktor — Lazizbek Khudayev;
• strategik rivojlanish bo‘yicha direktor — Makhliyokhon Muksinova;
• inklyuziv rivojlanish bo‘yicha direktor — Dilafruz Miralimova;
• hududiy rivojlanish bo‘yicha direktor — Azam Abdullaev.