O‘zbekiston iqtisodiyoti 2025-yilda 7,4% ga o‘sadi

O‘zbekiston iqtisodiyoti 2025-yilda 7,4%, 2026-yilda esa 6,8% ga o‘sadi. Bu haqda “Kommersant” nashri Yevrosiyo taraqqiyot banki (YeOTB) hisobotiga tayanib xabar bermoqda.

Joriy yilda yalpi ichki mahsulot o‘sishiga respublikada amalga oshirilayotgan islohotlar ijobiy ta’sir ko‘rsatgan. 2026-yilda o‘sish sur’atining biroz pasayishi esa YTB ekspertlari tomonidan iste’mol faolligining qisman susayishi bilan izohlanmoqda.

YeOTB prognoziga ko‘ra, Markaziy Osiyo iqtisodiyoti 2025-yilda 6,6% ga o‘sadi. Mintaqada eng yuqori o‘sish Qirg‘izistonda kutilmoqda — joriy yilda 10,3%, 2026-yilda esa 9,3%. Tojikiston iqtisodiyoti mos ravishda 8,3% va 8,1% ga o‘sishi prognoz qilinmoqda.

Qozog‘iston iqtisodiyoti 2025-yilda 5,9%, 2026 yilda esa 5,5% o‘sadi.

Shuningdek, YeOTB tahlilchilari Markaziy Osiyoning investitsiyaviy jozibadorligi oshishda davom etayotganini qayd etmoqda. Avvalroq bank joriy yil iyul oyi boshiga kelib O‘zbekiston Yevrosiyodagi o‘zaro investitsiyalarning eng yirik qabul qiluvchisiga aylanganini ma’lum qilgan edi. Mamlakat $10,7 mlrddan ortiq investitsiya jalb qilib, bu mintaqadagi jami sarmoyalarning 22% ini tashkil etadi.