Alibaba Cloud O‘zbekistonda soliq to‘lovchi sifatida ro‘yxatdan o‘tdi

28-yanvar kuni Alibaba Cloud (Singapore) Private Limited kompaniyasi tax.uz QQS-ofisi orqali O‘zbekistonda elektron xizmatlar uchun QQS to‘lovchisi sifatida ro‘yxatdan o‘tdi. Bu haqda Soliq qo‘mitasi xabar berdi.

O‘zbekistonda elektron xizmatlar ko‘rsatuvchi xorijiy kompaniyalar jismoniy shaxslarga xizmat ko‘rsatgan taqdirda QQS to‘lashi shart. Hozirda mamlakatda 65 ta shunday kompaniya ro‘yxatga olingan.

2009-yilda asos solingan Alibaba Cloud bulutli hisoblash va sun’iy intellekt texnologiyalari bo‘yicha yetakchi kompaniyalardan biri hisoblanadi. U butun dunyo bo‘ylab 200 dan ortiq mamlakat va hududlarda korxonalar, dasturchilar va davlat tashkilotlariga xizmat ko‘rsatadi.