Xitoy kompaniyasi Samarqandda elektrosamokatlar ishlab chiqaradi

Samarqand viloyati Oqdaryo tumanida elektrosamokatlar va quyosh panelida ishlaydigan ko‘cha chiroqlari ishlab chiqariladi. Bu haqda viloyat hokimligi matbuot xizmati xabar qildi.

Xitoyning “Yaxing Guoji Maoyi” MCHJ mas’ullari viloyat hokimi vazifasini bajaruvchi Adiz Boboyevga Oqdaryo tumanida amalga oshirilishi ko‘zda tutilayotgan $28 mlnlik loyihani taqdim etdi.

Kompaniya tumanda alkogolsiz ichimliklar, kir yuvish kukuni, 2, 3 va 4 g‘ildirakli zamonaviy elektrosomakatlar, shuningdek, quyosh panelida ishlaydigan ko‘cha chiroqlarini ishlab chiqarishni yo‘lga qo‘yadi.

Loyihaning birinchi bosqichida $16,5 mln o‘zlashtirilib, korxona 2026-yil fevral oyida ishga tushishi ko‘zda tutilgan.

Biroq, xabarda aytilishicha, ishlab chiqarishni muvaffaqiyatli yo‘lga qo‘yish uchun tumandagi “Urgut” EIZ filiali joylashgan Dahbed massiviga olib boruvchi avtomobil yo‘lini qurish zarur.

Investorlar shu masalada viloyat hokimiga murojaat qilgan. Adiz Boboyev avtomobil yo‘llari boshqarmasi mutasaddilariga masalani tezkor hal etishni topshirib, tadbirkorlarga barcha masalalarda qonun doirasida yordam ko‘rsatilishini ta’kidladi, deyiladi xabarda.

Ishlab chiqarish yo‘lga qo‘yilishi natijasida hududda 40 ta yangi ish o‘rni yaratilishi aytilmoqda.